Кеча хонанда Райхон "Ҳумо Арена" да бўлиб ўтиши керак бўлган концерти кейинга қолдирилаётганини айтди. Унинг сўзларига кўра, бунинг сабаби ташкилотчиларнинг масъулиятсизлиги бўлган. Ўз навбатида, ушбу концертни тайёрлаш билан шуғулланувчи компания бекор қилинишига талабнинг йўқлиги, чипталарнинг атиги 10 фоизи сотиб олинганини билдирган.
Райхоннинг хабар беришича, яқин келажакда бошқа компания томонидан ташкил этиладиган концертнинг янги санаси маълум бўлади. Шунингдек, у илгари харид қилинган барча чипталарни топшириш ва пулини олиш мумкинлигини билдирган.
Дастлаб концертни ташкил қилиш билан шуғулланган компания "бекор қилишнинг сабаби шундаки, концертнинг кучли реклама кампанияси ташкил этилганига қарамай, уч ярим ойлик реклама ва 24 кун ичида атиги 800 га яқин чипталар сотилган. Залнинг сиғими эса 8500 кишини ташкил қилади”, -дея маълумот берган.
"Ушбу лойиҳани амалга ошириш учун кўп куч, вақт ва ресурслар сарфланди. Аммо, афсуски, концерт чипталарини сотиш динамикаси тадбирни бекор қилишга мажбур этди. Шуни ҳам таъкидлашни истардимки, тайёргарлик жараёнида лойиҳани ташкил этиш харажатлари сметаси хонанда томонининг истаклари ва талабларидан келиб чиққан ҳолда қарийб 35% га ошди, аммо концерт нархи ошмади", – дея қўшимча қилишмоқда ташкилотчилар.
Компания пойтахт аҳолиси ва меҳмонлари учун катта шоу ташкил этишдан манфаатдор эканини таъкидламоқда, аммо афсуски, чипталар сотуви кутилган натижаларни бермаган ва концерт бекор қилинган пайтда залнинг тўлиши тахминан 10 фоизни ташкил этган.
"Лойиҳа мутлақо фойдасиз бўлиб қолди ва зарар миқдори жуда катта бўлиб чиқди. Бу ҳолда концертни бекор қилиш жуда мажбурий чорадир. Ушбу концерт учун сотиб олинган барча чипталар қайтарилади. Бунинг учун iTicket.uz чипта операторига мурожаат қилиш мумкин", - дея таъкидлашмоқда ташкилотчилар.
"Бизнинг иш тажрибамизни ҳисобга олган ҳолда, бу ички, ташкилий жараёнларни жамоат майдонига олиб чиқишнинг биринчи ҳолатидир. Аммо ушбу концертни ташкил қилиш учун мислсиз куч, вақт ва қайтариб бўлмайдиган маблағ сарфлаган раҳбар ва бутун жамоага қарши асоссиз оммавий айбловлар бизга бошқа илож қолдирмади", – дея хулоса қилди компания.
