Ўзини биринчи маҳаллий арзон авиакомпания ва “Афросиёб” тезюрар поездларига ўзига хос муқобил сифатида кўрсатган Silk Avia минтақавий авиакомпанияси яқин келажакда Uzbekistan Airways бошқарувига берилиши мумкин.
Вазият билан таниш бўлган манба маълумотларига кўра, ҳозирда авиакомпанияни Uzbekistan Airways тузилмасига ўтказишни назарда тутувчи қарор лойиҳаси тайёрланган, у ATR72-600 самолётларини сотиб олиш учун олинган кредитлар бўйича фоизларни тўлашга ҳам жавоб беради. Суҳбатдошнинг қўшимча қилишича, Humo Air билан бўлгани каби, давлат авиакомпаниясини сотиш масаласи кўриб чиқилмаяпти.
Эслатиб ўтамизки, Silk Avia 25 апрель куни Ўзбекистон шаҳарларига мунтазам авиарейсларни амалга оширишни бошлаган ва тўрт ойлик парвозлар давомида 42,5 мингга яқин йўловчини ташиган. Авиаташувчи ўзининг биринчи халқаро парвозини 5 август куни Тошкент ва Иссиқкўлни боғлаб амалга оширган эди.
Ҳозирги вақтда авиакомпанияда ATR72-600 типидаги учта самолёт ишлатилади. Июнь ойида лоукостер авиапаркни яна учта ATR72-600 ва иккита кичик сиғимли (50 нафаргача йўловчи) ATR42-600 самолётлари билан тўлдириш тўғрисида келишиб олганди.
Бундан ташқари, Париждаги авиасалон доирасида авиакомпания Nordic Aviation Capital ( (Ирландия) лизинг компанияси билан иккита ATR72-600 самолётининг операцион лизинги бўйича шартнома имзолаган. Ҳаво кемалари Тошкентга 2023 йил октябрь ва ноябрь ойларида Тулузадаги (Франсия) ATR заводидан олиб келинади.
