Яқин келажакда Хитой автомобиллари жорий трендларни сақлаб қолган тақдирда маҳаллий автомобилсозлик етакчиси – UzAuto Motors компаниясини четга суриши мумкин. Биргина йил бошидан буён мамлакатга тахминан 1,2 миллиард долларга 65,3 мингта Хитой автомобиллари олиб келинган. Ҳозирча барча хитойлик машиналар кроссовер ва электромобиллар бўлиб, улар оммавий харидор учун арзон эмас. Бироқ, арзон машиналар бизгача етиб келганда ва кўпайиб кетганда нима бўларкан?

Хитой Халқ Республикаси божхона бошқармасининг маълум қилишича, Хитой жорий йилнинг тўққиз ойи якунлари бўйича Ўзбекистонга автомобиллар экспортини 5,8 баробарга оширган. Шу билан бирга, электромобиллар экспорти 4,1 баравар кўпайган,   яъни 20,6 мингни ташкил қилган.

Ўзбек статистикаси эса бироз бошқача рақамларни берган. Статистика агентлиги маълумотларига кўра, жорий йилнинг етти ойида электромобиллар импорти ҳақиқатан ҳам қарийб 6 баравар ошган, энг кўп импорт қилинган автомобиллар Хитойга тўғри келади. Бироқ, етказиб бериш рақамлари бутунлай бошқача.

2023 йилнинг январь-июль ойларида Ўзбекистон 10 та хорижий давлатдан 217,1 миллион долларлик 7391 та электромобиль импорт қилган. Электромобиллар импорти ўтган йилнинг мос даврига нисбатан 6084 донага ёки қарийб 6 бараварга кўпайган.

7 ой ичида энг кўп электромобиль импорт қилинган мамлакатлар:

• Хитой – 6898

• Гонконг-376

• Германия-64

• Корея – 18

• БАА-16

• АҚШ – 11

Эҳтимол, рақамлардаги бундай фарқ Хитой автомобилларини Ўзбекистон орқали бошқа мамлакатларга қайта экспорт қилиш билан боғлиқ бўлиши мумкин.

Эслатиб ўтамизки, ўтган йилнинг охирида президентнинг "Автомобил ишлаб чиқаришни ташкил этишни давлат томонидан қўллаб-қувватлаш чора-тадбирлари тўғрисида"ги қарори чиқиб, унда электромобиллар ишлаб чиқарувчилари утилизация йиғимидан ва импорт қилинадиган бутловчи қисмларга божхона божини тўлашдан озод қилинган.