"Юксалиш" умуммиллий ҳаракати етакчиси ва депутат Бобур Бекмуродовнинг айтишича, Ўзбекистон таҳдидларга жавобан 6 миллион ҳарбий хизматчини сафарбар қилишга қодир.  

"Биз таҳдид ва тажовузга жавоб бера оладиган кучли мамлакатмиз. Ҳозирда МДҲ мамлакатлари орасида учинчи ўринда турадиган кучли армиямиз ва ҳар доим ўз Ватанини ҳимоя қилишга тайёр бўлган юқори жанговар руҳга эга 50 мингдан ортиқ аскарларимиз бор", - деб ёзган Бобур Бекмуродов.

Бекмуродовнинг хабар беришича, сўнгги бир неча йил ичида Ўзбекистон армиясининг имкониятлари, маблағлари ва инфратузилмаси мустаҳкамланди. Ҳар йили 300 минг ҳарбий хизматчи қўшилади ва мамлакатда сафарбарликка тайёр жами 6 миллиондан ортиқ фуқаролар мавжуд.

"Ишонч билан айта оламанки, ички ва ташқи масалаларга бўлган қарашларимиздан қатъи назар, биз Ватанни ҳимоя қилиш учун бирлаша оладиган жасур халқмиз", - деб хулоса қилди нашр муаллифи.

Шу билан бирга, "Юксалиш" раҳбари тинчлик миллат учун энг олий эзгулик ва асосий қадрият эканлигини таъкидлаган. "Можаронинг сабаблари кўп бўлса ҳам, халқимиз доимо тинчликни сақлаш учун сабаб топади", - деди у.

Таъкидлаш лозимки, "Юксалиш" раисининг чиқиши Прилепиннинг собиқ СССР, хусусан, Ўзбекистон ҳудудларини Россия Федерациясига қўшилиши ҳақидаги сўзларига муносабатдир.

Эслатиб ўтамизки, Россиянинг Ўзбекистондаги элчиси, шунингдек, Россия Ташқи ишлар вазирлигининг расмий вакили Мария Захарова Захар Прилепиннинг сўзларига изоҳ бериб, Россия ҳеч қачон Ўзбекистоннинг мустақиллиги ва ҳудудий яхлитлигини шубҳа остига қўймаганлигини ва мамлакатларимиз ўртасидаги муносабатлар суверенитет, ички ишларга аралашмаслик, дўстлик ва яхши қўшничиликни ҳурмат қилиш асосида қурилганлигини айтган.