Пойтахтнинг ер усти жамоат транспорти ўтган йил давомида 241,7 миллиондан ортиқ йўловчига хизмат кўрсатган.  

"Тошшаҳартрансхизмат" маълумотларига кўра, 2023 йилда ўртача 662,3 минг нафар йўловчи автобус хизматларидан фойдаланган. Бу ўтган йилга нисбатан 62 фоизга кўп. 2022 йилда эса кунига ўртача 404,4 минг йўловчи ташилган.

Ўртача шаҳар автобуслари ҳар куни 16,8 мингта сафарни амалга оширган. Бу кўрсаткич 59,8 фоизга ошган. 2023 йилда жами 6,1 миллиондан ортиқ сафар қилинган.

Эслатиб ўтамизки, ўтган йили Тошкентга газ ва электр ёқилғисида ишлайдиган минглаб автобуслардан иборат катта партия олиб келинган. Бугунги кунда шаҳар кўчаларида 2017 та жамоат транспорти мавжуд.

Бундан ташқари, бугунги кунда маълум бўлганидек, Тошкентда хитойлик ҳамкасблар ҳамкорлигида арқонли жамоат транспортини ишга тушириш режалаштирилган.