Ўзбекистонда Иккинчи жаҳон уруши қатнашчиси ва ногиронларига 20 миллион сўмдан тўланади.
Президент Шавкат Мирзиёев томонидан тегишли фармон имзоланган.
Унда айтилишича, мазкур чора «мамлакатимизда 9 май – Хотира ва қадрлаш куни умумхалқ байрами сифатида кенг нишонланиши, шунингдек, Иккинчи жаҳон урушида ҳалок бўлган аждодларимиз хотирасини абадийлаштириш, бугун ҳам сафимизда туриб, Ватанимизнинг обрў-эътиборини юксалтиришга, ёшларни маънавий-ахлоқий жиҳатдан тарбиялашга ҳисса қўшаётган фахрийларни эъзозлаш ҳамда фашизм устидан қозонилган ғалабанинг 79 йиллиги муносабати билан уруш қатнашчилари ва ногиронларини моддий рағбатлантириш мақсадида» қабул қилинган.
Маблағлар республика бюджетидан ажратилиб, ҳар бир фахрийга тантанали равишда топширилади.
Эслатиб ўтамизки, ўтган йили тўлов 18 миллион сўмни, 2022 йилда эса 15 миллион сўмни ташкил этган эди.
