Будапештда бўлиб ўтаётган жаҳон шахмат олимпиадасининг сўнгги турларида Ўзбекистон вакиллари илк бор мағлубиятга учраган: 14 сентябрь куни эркаклар терма жамоаси вьетнамлик рақибларига мағлуб бўлган, эртаси куни аёллар жамоаси Грузиядан борган шахматчиларга ютқизган.  

Олимпиаданинг тўртинчи тури Ўзбекистон эркаклар терма жамоаси учун 1:3 ҳисобида якунланган. Нодирбек Абдусатторовнинг Ле Куанг Льемга қарши ва Жаҳонгир Воҳидовнинг Чан Туан Миьга қарши дурранг   партиялари ярим очкони берган. Жавоҳир Синдаров Ле Туан Миньга, Нодирбек Яккубоев эса Нгуен Нгок Чтонг Шонга мағлуб бўлган.

Ўзбекистон хотин-қизлар терма жамоаси шу куни Болгариядан борган рақибларини мағлуб этган. Маржона Маликова, Умида Омонова ва Нодира Нодиржанова рақиблари билан дурранг ўйнашган. 14 ёшли Афруза Ҳамдамованинг 45 ёшли Антоанета Стефанова устидан қозонган ғалабаси терма жамоамизга устунлик берган.

Бешинчи турда Ўзбекистон шахматчилари Молдова терма жамоаси билан ўйинларда ўзини тиклашга муваффақ бўлишган. Нодирбек Абдусатторов Иван Скицкодан, Жавоҳир Синдаров Виорел Бологандан, Шамсиддин Воҳидов Виорел Иордэкескудан устун келган. Нодирбек Ёқуббоевнинг Егор Лашкин билан партияси тенг натижа билан якун топган.

Ушбу турда ўзбекистонлик қизлар грузиялик рақибларидан мағлубиятга учрашган. Афруза Ҳамдамованинг дунёдаги энг кучли шахматчилардан бири бўлган 37 ёшли Нана Дзагнидзега қарши ўйини дуранг билан якунланган. Лела Жавахишвилига қарши чиққан Нилуфар Якуббоева ва Нино Бациашвили билан беллашган Умида Омонова ҳам жамоага ярим очко келтиришган. Ҳал қилувчи партияда Маржона Маликова Бела Хотенашвилига ютқизган.

Шундай қилиб, Ўзбекистон эркаклар терма жамоаси 7-ўринга кўтарилди. Ўзбекистон хотин-қизлар терма жамоаси эса турнирнинг 15-поғонасига тушиб кетган. Турнирда жами 197 эркак ва 184 аёл жамоаси иштирок этмоқда.

Эслатиб ўтамизки, аввалги турларда ўзбекистонликлар Тринидад ва Тобаго, Миср ва Хорватиядан борган рақибларини мағлуб этишган. Шахматчиларимиз Гаити, Ангола, Венгриядан ташриф буюрган рақибларидан устун келган.

Бугунги ўйинларда шахматчиларимиз Исроил вакиллари билан жанг қилишади, шахматчи қизлар эса голландиялик спортчиларга қарши чиқишади.