Буюк Британиянинг нуфузли Times Higher Education (THE) халқаро рейтинг ташкилоти World University Rankings-2025 (Дунё университетлари рейтинги-2025) ТОП-1000 олий таълим ташкилотлари рўйхатини эълон қилди.

Қувонарлиси, Ўзбекистоннинг 3 та олий таълим муассасаси илк бор ушбу рўйхатдан жой олди.

Булар:

▪️ «Тошкент ирригация ва қишлоқ хўжалигини механизациялаш муҳандислари институти» Миллий тадқиқот университети — 601–800 ўрин;

▪️ Ўзбекистон миллий университети — 1001–1200;

▪️ Тошкент ахборот технологиялари университети — 1501-ўрин.

Бундан ташқари, Ўзбекистондаги яна 48 та ОТМ репортёр (даъвогар) мақомида ушбу рўйхатга киритилган.

Таъкидланишича, THE'нинг тадқиқот сифати мезони бўйича тайёрлаган ҳисоботида Ўзбекистон олийгоҳларининг ушбу мезондаги натижалари жаҳон ўртача кўрсаткичидан юқорида экани қайд этилган.

Маълумот учун, Times Higher Education рейтинг ташкилоти дунёнинг 133 давлатига тегишли 2 860 дан ортиқ олий таълим ташкилотларини баҳолаб келади. Бунда баҳолашнинг асосий мезонлари уларнинг халқаро даражадаги академик нуфузи, илмий нашрлар фаоллиги, иқтибослик самарадорлиги, билимлар трансфери, халқаро ҳамкорлик ҳамда илм-фан ва ижтимоий соҳа равнақига қўшган ҳиссасига қаратилади.