Кеча, 27 ноябрда, Исроил ва "Ҳизбуллоҳ" ҳаракати ўртасидаги келишув битими расман кучга кирди. АҚШ президенти Джо Байденнинг маълумотларига кўра, ушбу келишув Вашингтон воситачилигида эришилган ва унинг мақсади минтақадаги вазиятни барқарорлаштиришдир.
Келишув шартларига кўра, "Ҳизбуллоҳ" қуролланишни тўхтатиши ва Исроилга қарши ҳар қандай ҳужумлардан ўзини тийиши шарт. Шу билан бирга, ҳаракатнинг қуролли тузилмалари чегарадан камида 30 километр масофада, Литани дарёсидан ташқарига олиб чиқилиши лозим.
Исроил эса 60 кун ичида ўз қўшинларини Ливан жанубидан олиб чиқишни ўз зиммасига олади. Бу жараёндан сўнг, ушбу ҳудудлар Ливан армияси назорати остига ўтади. Ливан ҳарбий кучлари "Ҳизбуллоҳ"нинг озод қилинган ҳудудларга қайтишини олдини олиш учун масъул бўлади.
Келишувда шундан ташқари, Исроил "Ҳизбуллоҳ"ни қуроллантириш билан боғлиқ ҳар қандай объектлар унинг назорати остида пайдо бўлса, уларни йўқ қилиш ҳуқуқини ўзида сақлаб қолади. Эришилган келишувларни амалга ошириш учун АҚШ бошчилигида халқаро қўмита тузилади, бу қўмитанинг вазифаси вазиятни назорат қилишдан иборат бўлади.
Эслатиб ўтамизки, Исроил ва "Ҳизбуллоҳ" ўртасидаги жанглар октябрь ойида авж олган эди, бу вақтда Исроил Жанубий Ливанга қуруқликдаги ҳужумни бошлаган. Можаро жиддий вайронагарчиликларга ва кўплаб қурбонларга, шу жумладан тинч аҳолининг жабрланишига олиб келди. Келишувнинг амалга ошиши минтақадаги тинчликни таъминлашда муҳим аҳамиятга эга.
