Telegram асосчиси Павел Дуров Франция судида мессенжер модерациясини яхшилаш ва қонунбузарликларга қарши курашиш мажбуриятини олганини эълон қилди.
Franceinfo маълумотига кўра, Дуров уч адвокат ҳамроҳлигида модерация жараёнларини яхшилаш бўйича режаларини баён қилди. Унинг сўзларига кўра, Telegram ҳар ойда қонунбузарликлар сабаб 15-20 миллион фойдаланувчи аккаунтини ўчирмоқда. Шунингдек, сўнгги ярим йил ичида ҳуқуқ-тартибот органлари билан ҳамкорликда 10 минг фойдаланувчининг маълумотлари тегишли давлатларга тақдим этилган.
Эслатиб ўтамиз, Дуров 2024 йилнинг август ойида Францияга келганида қўлга олинган ва унга бир қатор жиддий айбловлар қўйилган. Telegram жиноий фаолиятга алоқадор бўлгани иддао қилинмоқда. Гаров эвазига озод қилинган тадбиркор Франциядан чиқиб кетмаслик шарти билан суд назорати остида қолмоқда.
Дуровнинг сўнгги ҳаракатлари Telegram’ни тозалаш ва фойдаланувчи хавфсизлигини таъминлаш йўлида муҳим қадам сифатида баҳоланмоқда.