Telegram 2018 йилдан бери жиноятчиларнинг IP манзиллари ва телефон рақамларини ошкор қила олади. Бу ҳақда мессенжер асосчиси Павел Дуров ўз каналида маълум қилган.

Эслатиб ўтамизки, 23 сентябрь куни у Telegram ҳуқуқни муҳофаза қилиш органларига жиноятларга алоқадор одамларнинг IP-манзиллари ва телефон рақамларини ошкор қилишини айтди.

Бугун эса Дуров мессенжернинг ишида аслида кўп нарса ўзгармаганлигини таъкидлаган.

"Тегишли алоқа линиялари орқали тўғри расмийлаштирилган қонуний сўровни олганимизда, биз уни текширдик ва хавфли жиноятчиларнинг IP манзиллари/телефон рақамларини ошкор қилдик. Бу жараён ўтган ҳафтадан анча олдин мавжуд эди",- дейилмоқда унинг хабарида.

Шундай қилиб, унинг сўзларига кўра, 2024 йилда Telegram Бразилиянинг 203 та қонуний сўрови ва Ҳиндистоннинг 6992 та сўрови бўйича маълумотларни ошкор қилган. Учинчи чоракда Европа ҳукумати томонидан қабул қилинган сўровлар сони ўсган, чунки “Европа Иттифоқининг юридик органлари ниҳоят тўғри алоқа линиясидан фойдаланишни бошлашган”, - деди тадбиркор.

Шунингдек, у ўтган ҳафта мессенжер жамоаси турли мамлакатлар учун махфийлик сиёсатини тартибга солганини ва бирлаштирганини таъкидлаган. Шу билан бирга, асосий тамойиллар ўзгармаган: Telegram ҳар доим маҳаллий қонунларга риоя қилишга интилган, токи улар эркинлик ва махфийлик қадриятларига зид бўлмагунча.

"Telegram фаоллар ва оддий одамларни коррупциялашган ҳукуматлар ва корпорациялардан ҳимоя қилиш учун яратилган – биз жиноятчиларнинг платформамизни суистеъмол қилишига ёки адолатдан қочишига йўл қўймаймиз", - деб хулоса қилди Дуров.

Эслатиб ўтамизки, Францияда тадбиркорнинг ўзи учинчи шахслар томонидан содир этилган турли хил жиноятларда айбланмоқда. У ҳибсга олинган, аммо гаров эвазига чиқариб юборилган ва унга мамлакатни тарк этиш тақиқланган.