2024 йил якунлари бўйича Ўзбекистонга жами қиймати 1,28 миллиард долларга тенг бўлган 74,7 мингта енгил автомобил, шу жумладан электромобиллар олиб келинган. Бу ҳақда Давлат статистика қўмитаси маълумот берди.
Импорт кўрсаткичлари
Хитой Ўзбекистоннинг асосий автомобил етказиб берувчиси бўлиб қолмоқда. Ушбу давлатдан 61 мингдан ортиқ автомобил, жумладан, 22,1 мингта электромобил импорт қилинган. Бу мамлакатдан келган автомобиль импорти умумий ҳажмнинг 81,6 фоизини ташкил қилади.
Импорт бўйича иккинчи ўринда Жанубий Корея жойлашган бўлиб, у 12 мингга яқин автомобил етказиб берган. Учинчи ўринда АҚШ турибди (639 та автомобил), ундан кейин Ҳиндистон (577 та), Япония (168 та) ва бошқа мамлакатлардан (374 та) автомобиль келтирилган.
Импорт ҳажми пасайиши
Божхона қўмитаси маълумотларига кўра, 2024 йилда Ўзбекистонда автомобил импорти ҳажми 2023 йилга нисбатан пасайган. Қиймат жиҳатидан пасайиш 33,2 фоизни, миқдорий жиҳатдан эса 7 фоизни ташкил этди.
Автомобил бозори: ички савдо
Ўзбекистонда 2024 йил давомида 400 мингдан ортиқ енгил автомобил сотилган бўлиб, уларнинг асосий қисми UzAuto Motors компанияси томонидан ишлаб чиқарилган.
Ушбу маълумотлар мамлакатда ташқи савдо ва ички автомобил бозоридаги ҳолатни очиқ ифода этмоқда. Айниқса, электромобилларга бўлган талабнинг ошиши ва импортнинг асосий қисми Хитойга тўғри келиши муҳим тенденция сифатида қайд этилмоқда.
