АҚШнинг Fox News нашри Россия президенти Владимир Путиндан кейинги эҳтимолий ворис ҳақида кутилмаган тахминни илгари сурди. Нашрга кўра, Россиянинг таниқли хоккейчиси, "Вашингтон Кэпиталз" клуби сардори Александр Овечкин келажакда Кремль етакчисига айланиши мумкин.
Журналист Дуглас Маккинноннинг фикрича, Овечкин нафақат дунёда машҳур спортчи, балки оилапарвар, саховатли ва интизомли инсон сифатида танилган. У Россиянинг Украинага бостириб кириши туфайли жаҳон аренасида рус спортчиларига нисбатан босим кучайган бир пайтда ҳам ўз обрўсини сақлаб қолди.
Муаллиф таъкидлашича, Путиннинг ҳокимиятдан кетиши муқаррар ва ўша пайтда машҳурлик, етакчилик қобилияти ҳамда халқаро нуфузга эга инсонлардан бири сифатида Овечкин президентликка муносиб номзод бўлиши мумкин.
Шунингдек, мақолада Овечкиннинг Путинга хайрихоҳ шахс экани, у 2017 йилда Путинни қўллаб-қувватлаш учун "Putin Team" ҳаракатини ташкил қилгани ҳам эслаб ўтилган. Хоккейчи Путин билан яқин муносабатларга эга бўлиб, давлат раҳбари унга қимматбаҳо совғалар тақдим этгани маълум.
Бунга қарамай, таҳлилчилар Россияда ҳокимият алмашиши эҳтимоли борасида турлича фикр билдирмоқда. Бир томондан, Аббас Галлямов ва бошқа сиёсатшунослар Путин ҳокимиятни бой бера бошлаганини иддао қилса, иккинчи томондан, Германия федерал разведка хизмати раҳбари Бруно Каль бу фикрларни рад этган.
Россия президентининг соғлиги борасидаги баҳслар ҳам йиллар давомида давом этмоқда. 2023 йилда интернетга сиздирилган АҚШ махфий ҳужжатларида Путин онкологик хасталикка чалингани ҳақида маълумотлар берилган эди. Аммо Россия расмий манбалари бундай иддаоларни мунтазам инкор қилиб келмоқда.
