Россияда “Moskvich 8” кроссовери савдога чиқиш арафасида. Автомобиль тез кунларда мамлакат бозорида сотувга чиқарилиши кутилмоқда. Бу ҳақда Autonews.ru нашри ишончли манбаларга таянган ҳолда хабар берди.

“Moskvich” заводи савдоларнинг аниқ бошланиш санасини ошкор этмаган бўлса-да, компания вакиллари “сотувлар тез орада бошланади” дея маълум қилди.

Аввалги режаларга кўра, “Moskvich 8” ишлаб чиқарилиши 2024 йил октябрига, бозорга чиқиши эса 2024 йил охирига белгиланган эди. Аммо бу муддат бир неча бор кечиктирилиб, 2025 йил баҳоригача сурилган ва дунёга чиқиши фақат 2025 йилнинг иккинчи ярмида амалга ошиши мумкинлиги маълум бўлди.

Модель илк бор 2024 йил апрель ойида намойиш этилган бўлиб, у етти ўринли, оилавий ва саёҳатлар учун мўлжалланган кроссовер сифатида тақдим этилган.

Автомобил ташқи кўриниши билан эътиборни тортади: LED ёруғлик элементлари, кенг радиатор панжараси ва бутун орқа қисм бўйлаб чўзилган диодли чизиқ каби элементлар билан жиҳозланган. Шу билан бирга, “Moskvich 8” дизайни асосан Хитойнинг JAC Sehol X8 Plus моделидан олингани ва деярли тўлиқ кўчирилгани қайд этилмоқда.

Бундан аввал “Moskvich 5” кроссовери ҳақида ҳам тақдимот ўтказилган эди. “Moskvich” бренди Россияда қайта тикланаётган автосаноатнинг рамзларидан бири сифатида талқин этилмоқда.