Олимпиада чемпиони Лазизбек Муллажоновнинг допинг-тести натижаси ижобий чиққани соч экиш операциясидан кейин ёзилган дорилар билан боғлиқ бўлиши мумкин, деб хабар берди Ўзбекистон Бокс федерацияси. Барча тиббий ҳужжатлар Халқаро тест агентлигига (ITA) тақдим этилган.
2025 йил 29 июл куни ITA томонидан Муллажонов антидопинг қоидаларини бузгани учун вақтинча дисквалификация қилингани эълон қилинган эди. Федерациянинг таъкидлашича, боксчи аввалги барча тестларда салбий натижа қайд этган ва мунтазам равишда текширувлардан ўтиб келган.
2024 йил ноябрда, Олимпиададан сўнг, у Фарғонадаги хусусий клиникада соч кўчириш операциясини ўтказган. Ушбу муолажадан сўнг тахминан анаболик стероидлар бўлган баъзи дорилар тайинланган бўлиши мумкин.
ITA маълумотига кўра, 2025 йил 11 июн куни, мусобақадан ташқари олинган намунада метастерон метаболитлари аниқланган. Бу моддалар мушак ўсиши ва чидамлиликни оширадиган тақиқланган анаболик стероидлар ҳисобланади. Улар ҳам мусобақа пайтида, ҳам ундан ташқарида ман этилган.
Ўзбекистон Бокс федерацияси бу воқеа Муллажоновнинг Париж Олимпиадасидаги натижаларига таъсир қилмаслигини, унинг дисквалификация қилиниши ҳақидаги хабарлар эса асоссиз эканини маълум қилди.
Маълумот учун: Лазизбек Муллажонов 92 кг вазн тоифасида Олимпиада олтин медалини қўлга киритган, ҳозирда эса профессионал боксда фаолият юритмоқда.
