АҚШнинг Аляска штатидан бошланган тарихий учрашув ортидан таҳлилчилар бир овоздан: “Путин очко олди, Трамп эса қўлга ҳеч қандай амалий натижа киритмади”, деган хулосага келишмоқда.
15 август куни Доналд Трамп ва Владимир Путиннинг қарийб 3 соат давом этган музокараси Украинада ўт очишни тўхтатиш ёки тинчлик келишуви каби асосий масалаларда ҳеч қандай натижа бермади. Аммо Путин учун бу учрашувнинг сиёсий қиймати катта бўлди: у 2015 йилдан сўнг илк бор АҚШ заминида дабдаба билан кутиб олинди ва халқаро сиёсатга қайта “қадам қўйди”.
Путиннинг сиёсий “ютуғи”
Трамп Путинни шахсан аэропортда қизил гилам билан қарши олди.
Икки президент бир лимузинда музокара залига йўл олди.
Трамп учрашувни “10 баллик тизимда 10 балл” деб баҳолади.
Sky News ва BBC нашрлари ёзишича, Путиннинг асосий мақсади амалга ошди: у халқаро майдонда яккаланган раҳбар эмас, балки АҚШ президентининг тенгдош ҳамкори сифатида намоён этилди.
Европа ва Украинада кескин танқид
Европа давлатлари ва Украина бундай ҳурмат билан кутиб олишни “сиёсий хато” сифатида баҳолади.
Германия дипломати Вольфганг Ишингер “ўйин Путин фойдасига ҳал бўлди: ҳисоб 1:0” деди.
Украина элчилари ва сиёсий доиралари бу ҳолатни “нафратга лойиқ иш” сифатида баҳолади.
Натижасиз музокара
Музокарада Украинадаги тинч аҳолига нисбатан зўравонлик, Россиянинг ҳарбий жиноятлари ёки янги санкциялар ҳақида гапирилмади. Бу эса таҳлилчилар назарида Кремлнинг қўли баланд келганидан далолат.
Нима кутилмоқда?
Путин Трампни Москвага таклиф қилди. Шу билан бирга, Европа ва АҚШ энди Зеленский иштирокида уч томонлама саммит ташкил этиш зарурлигини билдирди. CNN’нинг сўнгги маълумотларига кўра, Украина учун НАТОнинг 5-моддасига ўхшаш хавфсизлик кафолати муҳокама қилинмоқда.
Хулоса: расмий ҳеч қандай келишувга эришилмаган бўлса-да, сиёсий имидж нуқтаи назаридан ҳисоб Путин фойдасига – 1:0.
