АҚШ Давлат департаменти 21 август куни мамлакат визасига эга бўлган 55 миллиондан ортиқ чет элликларни кенг қамровли текшириш жараёнини бошлади. Бу ҳақда “Associated Press” агентлиги хабарига таяниб маълум қилинди.
Маълумотларга кўра, текширувлар “доимий мониторинг” тарзида олиб борилади. Ҳар бир виза эгаси ҳужжатнинг амал қилиш муддати, жиноий фаолиятда иштирок этиши, жамоат хавфсизлигига таҳдид солиши ёки террорчилик ташкилотларини қўллаб-қувватлаши каби белгилари учун таҳлил қилинади. Агар бундай ҳолатлар аниқланса, виза дарҳол бекор қилинади, ҳужжат эгаси мамлакат ҳудудида бўлса, депортация қилинади.
Давлат департаменти текширув жараёнида ҳуқуқни муҳофаза қилиш органлари маълумотлар базаси, иммиграция хизматлари архиви ва ижтимоий тармоқлардаги фаолиятдан фойдаланишини таъкидлади.
Шунингдек, текширув доирасида талаба визалари ҳамда алмашинув дастурлари асосида берилган меҳмон визалари ҳам кўриб чиқилмоқда. Фақатгина ўтган ҳафтада 6 мингдан ортиқ талаба визаси бекор қилинди. Улардан қарийб 4 мингтаси қонунбузарлик сабабли, 200-300 таси эса терроризм билан боғлиқлиги учун мамлакатдан чиқариб юборилган.
Мутахассислар фикрича, бу жараён Трамп маъмуриятининг ноқонуний миграцияга қарши кескин сиёсати доирасида амалга оширилмоқда. Аввалроқ президент Дональд Трамп Мексика билан чегарада қурилаётган деворни қорага бўяш ғоясини илгари сурганди. Унинг фикрича, қора девор қуёш таъсирида қизиб, мигрантларнинг уни орқали ўтишига тўсқинлик қилади.
