Apple компанияси кечаги йирик тақдимотидан сўнг тўртта эски модел – iPhone 15, iPhone 15 Plus, iPhone 16 Pro ва iPhone 16 Pro Max ишлаб чиқарилишини тўхтатди. Компаниянинг расмий баёнотига кўра, энди бу смартфонларни фақат норасмий сотувчилар орқали харид қилиш мумкин бўлади.

Бу қарор Apple’нинг янги авлод смартфонлари тақдимоти билан боғлиқ. Куни кеча компания iPhone 17, iPhone 17 Pro ва iPhone 17 Air моделларини эълон қилди. Шу билан бирга, янги AirPods Pro 3 қулоқчинлари ҳамда Apple Watch Series 11, Apple Watch Ultra 3 ва Apple Watch SE 3 соатлари намойиш этилди.

Apple’нинг ҳар бир янги тақдимоти эски моделларнинг ишлаб чиқарилишини тўхтатиш билан ҳамоҳанг кечади. Бу орқали компания янги маҳсулотларга талабни ошириш, бозорни рағбатлантириш ва экотизимдаги ишлаб чиқаришни оптималлаштиришни кўзлайди.

Аналитикларнинг фикрича, iPhone 15 сериясининг қисқа муддатда ишлаб чиқарилиши компаниянинг стратегик ўзгаришлари билан боғлиқ. Эндиликда Apple асосий эътиборини сунъий интеллект имкониятлари, камера технологиялари ва узоқроқ батарея ҳаётига қаратиши кутилмоқда.