Ҳукумат "рақамли паспорт"ни ишга тушириш учун Тошкентда пилот лойиҳани амалга оширмоқчи. Бу аҳолига банклар ва меҳмонхоналар хизматларидан фойдаланиш, давлат хизматларини олиш, самолёт ва поезд чипталарини мажбурий қоғоз тасдиғисиз сотиб олиш имконини беради.
Бир қатор вазирликлар, шу жумладан Ички ишлар вазирлиги ва Молия вазирлиги томонидан ҳужжат лойиҳаси ишлаб чиқилиб, унинг доирасида Тошкентда 2022 йил 15 июлдан 2023 йил 1 декабргача "рақамли паспорт" ни жорий этиш бўйича пилот лойиҳанинг ишга туширилиши режалаштирилган.
Ҳужжатда айтилишича, пилот лойиҳа давомида “рақамли паспорт” ёрдамида давлат, банк, меҳмонхона ва сайёҳлик хизматларидан фойдаланиш, самолёт ва поезд чипталарини сотиб олиш мумкин бўлади. Шу билан бирга, агар фуқаролар томонидан “рақамли паспорт” тақдим этилса, ундан қоғоз ҳужжатларини талаб қилиш тақиқланади.
Биринчи босқичда рақамли паспортга қуйидаги ҳужжатлар киритилади: фуқаролик паспорти, ҳайдовчилик гувоҳномаси, автомобилнинг техник паспорти, ОТМни тугатганлиги тўғрисидаги диплом, мактабни тугатганлиги тўғрисидаги шаҳодатнома, коронавирусга қарши эмланганлик тўғрисидаги гувоҳнома, кадастр паспорти, туғилганлик тўғрисидаги гувоҳнома, никоҳни қайд этиш гувоҳномаси.
“Рақамли паспорт”дан 16 ёшга тўлган Ўзбекистон фуқаролари фойдаланишлари мумкин бўлади. Маълумотларнинг ҳақиқийлигини текшириш учун QR-кодидан фойдаланилади. Қизиғи шундаки, илованинг ишлаши учун Интернет-трафик нархланмайди. Яъни мобил интернетда пулингиз бўлмаса ҳам “рақамли паспорт” ишлайверади.
Лойиҳа муваффақиятли амалга оширилган тақдирда, бу тажрибани бутун мамлакат бўйлаб жорий қилиш режалаштирилган.
