Ҳиндистоннинг Гужарат штатида кўприкнинг қулаши оқибатида ҳалок бўлганлар сони 120 кишига етди. Бу ҳақда France Press хабар бермоқда. 

Полиция бошлиғи П.Декавадиа қидирув давомида қурбонлар сони ортиши мумкинлигини айтди.

Эслатиб ўтамиз, 30 октябр куни кечқурун Ҳиндистон ғарбидаги Мачху дарёси орқали ўтган 140 йиллик пиёдалар кўприги 500 га яқин одам билан қулаб тушди. Уларнинг 350 дан ортиғи сувда қолиб кетган.

Маҳаллий телеканал маълумотларига кўра, дастлаб ҳодиса оқибатида камида 90 киши ҳалок бўлган, яна 100 киши бедарак йўқолганлар рўйхатида. Расмийлар қурбонлар сони ортиб боришини истисно қилмаяпти.

Кўприк етти ойлик таъмирдан сўнг, 26 октабр куни очилганди. Кўприк хусусий компания томонидан таъмирланган ва махсус сертификатсиз фойдаланишга топширилган.