Бюллетенларнинг 92 фоизи ҳисоблаб чиқилганидан кейин биринчи турда номзодларнинг ҳеч бири 50 фоиздан юқори овоз тўплай олмаслиги маълум бўлмоқда. Бу эса иккинчи тур ўтказилишини англатади.

Туркияда президентлик ва парламент сайловларида овозларни ҳисоблаш жараёни давом этмоқда.

A Haber агентлиги маълумотига кўра, ҳозирга келиб сайлов қутиларининг 93 фоизи очилиб, овозлар ҳисобланган. Амалдаги президент Эрдўған ҳамон олдинда, аммо унга берилган овозлар миқдори 49,67 фоизгача тушиб кетди, бу эса президентлик сайловларида икки ҳафтадан кейин, 28 май куни иккинчи тур бўлишини кўрсатади. Унинг асосий рақиби Камол Қиличдорўғли тўплаган овозлар 44,59 фоизга етди.

Мухолифат номзоди Камол Қиличдорўғли бутун мамлакат бўйлаб мухолифат кузатувчиларини сайлов қутиларидан кўз узмасликка чақирган. У шунингдек Олий сайлов кенгашидан йирик шаҳарлардаги овоз бериш натижаларини эълон қилишни сўраган.

«60 фоиздан бошланган фантастика ҳозир 50 фоиздан пастга тушди. Сайлов бюллетенларини кузатувчилар ва сайлов комиссиясининг мансабдор шахслари ҳеч қачон ўз жойларини тарк этмаслиги керак. Бу кеча ухламаймиз, халқим», — дея ёзди Қиличдорўғли твиттерида.

Туркия Олий сайлов кенгаши раиси Аҳмет Йенер журналистлар қаршисига чиқиб, қисқа ахборот берди ва сўнгги расмий маълумотларни эълон қилди. Унинг маълумотларига кўра, Туркияда овозларнинг 47,08 фоизи ва хориждаги сайлов участкаларидаги овозларнинг 12,60 фоизи расман ҳисобга олинган. У расмий натижалар эълон қилиниши қасддан кечиктирилаётгани тўғрисидаги айбловни рад этди.

Мухолифат етакчиси Камол Қиличдорўғли кенгашни натижаларни ўз вақтида тақдим этмаётгани учун танқид қилганди.

Мухолифат бир неча бор натижаларга танқидий ёндашишга чақириб, сайлов комиссияси расмийлари ҳукумат манфаатларига ишлаётганини айтишган.

Эрдўғаннинг Адолат ва тараққиёт партияси раиси Умар Челик эса овозларни ҳисоблаш жараёни мутлақо шаффоф кечаётгани ва барча президентнинг ғалабасини тан олиши лозимлигини айтган.

Anka хусусий янгиликлар агентлиги маълумотига кўра, овозларнинг 78 фоизи ҳисоблаб чиқилган ҳолатда президент Эрдўғанда - 48,5 фоиз, Қиличдорўғлида - 45,7 фоиз овоз тўпланган.

Икки асосий номзод ўртасидаги улкан фарқ кўп аҳоли яшовчи йирик шаҳарлардаги овозларни ҳисоблаш бошланганида қисқара бошлади (дастлаб, 10 фоизга яқин бюллетенлар ҳисоблаб чиқилганда, Эрдўған 60 фоизга яқин овоз билан етакчилик қилаётган, Қиличдорўғлининг овозлари миқдори 34 фоиздан кўпроқ эди).

Эрдўған ҳамон олдинда бораётганига қарамай, мухолифатчиларнинг тарафдорлари кўпроқ бўлган учта йирик шаҳар - Истанбул, Анқара ва Измирдаги овозлар тўлиқ ҳисоблаб чиқилгач, натижалар ўзгариши мумкин.

Истанбулда 16 млн киши яшайди, пойтахт Анқарада ва ғарбдаги Измир шаҳрида 10 миллиондан киши истиқомат қилади. Ва бу уч шаҳарда ҳисоблаб бўлинган бюллетенлар сони мамлакат бўйлаб ўртача кўрсаткичдан камроқ.

Хусусан, Измирда сайлов қутиларининг 83 фоизи очилганида Қиличдорўғли катта устунлик билан олдинда эди - 62,31 фоизга 32,29 фоиз.

У Истанбулда ҳам етакчилик қилмоқда - бюллетенларнинг 72,74 фоизи ҳисобланган ҳолатда устунлик 48,34 фоизга 46,77 фоиз кўринишида эди. Анқарада эса кучлар деярли тенг - сайлов қутиларининг 84,48 фоизи ҳисоблаб чиқилганда, Эрдўғанда 47,6, Қиличдорўғлида 45,91 фоиз овоз тўпланганди.

Ҳозирча 45 миллионга яқин овозлар ҳисоблаб бўлинган, бу рўйхатдан ўтказилган жами сайловчилар сонининг учдан икки қисмига тенг.

Якуний натижалар фақат бир неча кун ўтиб расман эълон қилинади, аммо ҳозирдан айтиш мумкинки, давомат ўта юқори бўлди.