Агар аллақачон Threads'дан зериккан бўлсангиз ёки шунчаки у сизга ёқмаган бўлса ва аккаунтингизни ўчириб юбормоқчи бўлсангиз – бунинг иложи йўқ. Ахир Instagram аккаунтингиз ҳам унга қўшилиб ўчиб кетишини хоҳламайсизку, тўғрими? Бироқ битта йўли бор...

Бир неча кун аввал Meta компанияси ўзининг Twitter "клони" – Threads платформасини ишга туширди ва у Instagram аккаунт тизимидан фойдаланади, яъни сиз янги ижтимоий тармоққа Instagram аккаунт (@) юзернеймингизни сақлаб қолган ҳолда Threads'га ўтиш каби имкониятларга эгасиз. Аммо шу билан бирга сизнинг бутун Instagram аккаунтингиз Threads'га шундай боғланганки, уни Instagram'ни ўчирмасдан ўчира олмайсиз.

Instagram раҳбари, Адам Моссери ўзининг расмий Threads саҳифасида ушбу масалага оид саволларга шундай жавоб берган:

"Мен аккаунтни ўчириш ҳақида бир қанча саволлар оляпман. Аниқлик киритиш учун шуни айтишим мумкинки, сиз Threads аккаунтингизни деактивация қилиш билан профилингизни ва контентингизни яшириб қўйишингиз ёки профилингизни шахсий қилиб ўрнатиб, маълум thread'ларингизни ўчиришингиз мумкин - барчасини Instagram аккаунтингизни ўчирмаган ҳолда. Threads Instagramга асосланган, шунинг учун ҳозир бу фақат битта аккаунт, лекин биз Threads аккаунтингизни алоҳида ўчириш йўлини қидирмоқдамиз."

Моссери айтганидек, компания ҳозирда Threads аккаунтини Instagram'дан алоҳида ўчириш йўлини қидирмоқда, лекин айни вақтда ушбу функция мавжуд эмас ва Моссери бизга унинг қачон чиқарилишига оид ҳеч қандай маълумот бермади.

Бироқ, Instagram раҳбари айтганидек, сиз ҳозироқ Threads профилингиз ва постларингизни аккаунтингизни деактивация қилиш орқали яшириб қўйишингиз мумкин. Бунинг учун Threads иловасидан созламалар бўлимига ўтинг ва у ердан Account кейин эса, Deactivate profile ва Deactivate Threads profile устига босинг. Бунда сизнинг профилингиз Threads платформасидан йўқолади ва сизнинг thread'ларингиз, бошқа thread'ларга жавобларингиз, лайкларингиз яширилади. Агар аккаунтингизга қайта кирадиган бўлсангиз улар автоматик равишда қайта тикланади.