Ўзбекистон миллий терма жамоаси АҚШда ташкил этилган ўқув-машғулот йиғини доирасида Мексика терма жамоаси билан ўртоқлик учрашувини ўтказди.
Ўртоқлик баҳси кутилганидан анча кескин ва шиддатли ўтди. Дарвозаларга олтита тўп киритилган беллашувда кучлар тенг келди – 3:3.
Мексикаликлардан машҳур ҳужумчит Рауль Хименес дубль қайд этган бўлса, Уриэль Антуна йўқ жойдан гол уриб кетди. Ўзбекистон миллий терма жамоаси голларига Бобур Абдухолиқов, Азизбек Турғунбоев ва Отабек Шукуров муаллифлик қилди.
Мексика ва Ўзбекистон ўртасидаги учрашувни спортга ихтисослашган манбалар таҳлил қилмоқда. Sports.uz портали ўзбекистонлик футбол ишқибозлари эътиборига хориж сайтлари экспертларининг ўйин ҳақидаги фикрларини ҳавола этади.
ONEFOOTBALL.COM:
Мухлислар қайси жамоани қўллаб-қувватлашидан қатъи назар бу беллашувнинг натижа аҳамиятли бўлди. Ўйин бошидан Ўзбекистон футболчилари Мексика ҳимоясидаги нозик нуқталарни қидира бошлади.
Машҳур дарвозабон Гильермо Очоа ва мексикалик ҳимоячилар Бобур Абдухолиқов рақибидан устунлик қилиб, боши билан гол урган вазиятда довдираб қолишди. Лекин Рауль Хименес тезда вазиятни ўнглади.
Ўзбекистонликларнинг рақиб ҳимоясини ёриб ўтишга яна бир уриниши Азизбек Турғунбоевнинг аниқ зарбаси билан якунланди. Бу паллага келиб, мексикаликлар ташаббусни ўзига оғдириш илинжида тўпни ўзида ушлаб турганди. Улар 63 фоиз вақт давомида тўпга эгалик қилди. Лекин ўзбеклар иккита зарбада иккита гол уриб кетди.
Иккинчи бўлимда Рауль Хименес индивидуал ҳаракатлари эвазига ҳисобни тенглаштирган бўлса, Уриэль Антуна жамоани ғалабага яқинлаштирди. Мексикаликларнинг хурсандчилиги узоққа чўзилмади. Отабек Шукуров жарима зарбасидан Очоани ожиз қолдирди.
Ўйинда қайд этилган 3:3 ҳисобини жаҳон рейтингида 12-поғонада турган Мексика фойдасига ёзиб бўлмайди. ФИФА рўйхатининг 74-қаторидан жой эгаллаган Ўзбекистон учун бу дурангни ижобий натижа сифатида келтирса бўлади.
MEDIOTIEMPO.COM:
Мексика терма жамоаси бош мураббийи Хайме Лозанонинг натижалари мухлисларни хавотирга сола бошлади. Ҳозирги жамоа Жаҳон кубогидаги Мексикага ўхшамайди. Буни Ўзбекистон терма жамоаси 3:3 ҳисобида дуранг ўйнаб кўрсатиб берди.
Лосано бу ўйин Мексика учун фожеа эканини тушуниб етиши керак. Чунки жамоанинг тўпни эгаллашдаги устунлиги, рақибдан кучлилиги агар ҳимояни мустаҳкам ушлай олмаса, ҳеч қандай фойда бермайди.
Ўзбекистон амалда учта ҳужумда учта гол уриб кетди. Энди Лозано уйга қайтиб, терма жамоадаги жараёнларни яхшилаш ҳақида бош қотириши керак. Акс ҳолда ҳозирги ҳолат билан ҳеч нарсага эриша олмайди.
Мексика терма жамоасининг ҳимоя чизиғи жуда бўш. Буни осиёликлар учта гол билан исботлаб қўйди.
Кейинги ФИФА кунларида Лозано Гана ва Германия терма жамоаларига тўқнаш келади. Бу рақиблар яхшироқ тайёргарлик кўришни талаб этади. Салбий натижаларни эса, ҳеч қанақасига оқлаб бўлмайди.
SPORTINGNEWS.COM:
Ўзбекистон ўйинда асосан ҳимояланиш учун майдонга тушди, бироқ ўзини эркин ҳис қилиб, Мексика дарвозасини уч маротаба ишғол қилишни уддалади. Мексикаликлар яна бир ўйинда дурангни сақлаб қолди. Лекин сентярь ойидаги ўйинлар жуда кўп хавотирларни уйғотмоқда.
Атланта шаҳридаги “Мерседес-Бенц” аренасида Хайме Лосано шогирдлари терма жамоа тарихида илк бор Осиёнинг бу жамоасига тўқнаш келди.
Ўзбекистонликлардан Бобур Абдухолиқов бош билан, Азизбек Турғунбоев қарши ҳужумда, Отабек Шукуров жарима зарбасидан тўп киритиб, Мексика футболчиларининг учрашувни ғалаба билан якунлашига йўл қўймади.
Ҳамма Мексика футболчиларининг ғалабасини кутган ўртоқлик ўйини 3:3 ҳисобидаги дуранг билан якунланди.
