Ўзбекистоннинг икки нафар фуқароси Россиянинг чўмилиш тақиқланган Чунск туманида чўкиб кетишган. Ўзбекистонликларнинг жасадларини қидириш давом этмоқда.
Чунск тумани маъмурияти матбуот-хизмати таъкидлашича, воқеа 29 июнь куни кечқурун Октябрьск посёлкасидаги Чуна дарёсида содир бўлган.
"Гувоҳларнинг сўзларига кўра, 20 ва 21 ёшдаги йигитлар ўз ватандошлари билан бирга қирғоқда дам олиб, сузишга боришган. Бири чўкишни бошлаганда, иккинчиси уни қутқаришга уриниб кўрган ва ўзи ҳам сувга ғарқ бўлган ",- дейилмоқда хабарда.
Аниқланишича, cувга чўккан ўзбекистонликлар туман корхоналаридан бирида қонуний равишда ишлаган. Уларнинг жасадлари ҳали топилмаган. Қидиришда қутқарувчиларга кўнгиллилар ёрдам беришмоқда экан.
Эркаклар чўкиб кетган жойда дарёнинг чуқурлиги 5,7 метрни ташкил қилади, бу ерда чўмилиш тақиқланган бўлиб, қирғоққа тегишли белги ўрнатилган.
Эслатиб ўтамиз, ўтган йилнинг ёзида ўзбекистонлик мигрант Москва вилоятида пиво солинган идишга чўкиб кетган эди. У ундан бир оз ичмоқчи бўлиб, люкни очган, бироқ карбонат ангидрид туфайли боши айланиб кетган ва натижада у идиш ичига тушиб кетиб, чўкиб қолган.
