Марказий Осиёдан борган мигрантлар Давлат Думаси депутати Михаил Матвеевга ҳужум қилишган. У воқеани телефон камерасига туширган.  

Видеода у йўл четидаги одамларга яқинлашади ва можарога аралашишга ҳаракат қилади, шундан сўнг унинг бошига зарба   берилган.

"Маҳаллий йигитларимиз билан мигрантлар ўртасидаги жанжални тўхтатишга ҳаракат қилдим. Натижада, улар бошимни ёришди ", - деди Матвеев.

Депутатнинг сўзларига кўра, Марказий Осиёдан борган бир гуруҳ ёшлар пляжда дам олувчиларга ҳужум қилиб, жанжал уюштиришган ва сиёсатчига ҳужум қилишдан олдин камида бешта муштлашишда қатнашишган.

Полиция ҳуқуқбузарларни ҳибсга олган. Маълум бўлишича, икки нафар йигит Ўзбекистонда туғилган. Яна бири Тожикистон фуқароси. Айни пайтда уларга нисбатан "гуруҳ безорилиги" моддаси бўйича жиноий иш қўзғатилган, аммо тергов қўмитаси раиси Александр Бастрикин ишни "қотилликка суиқасд"га қайта малакалашни талаб қилган.

Бу иш Россия интернетида кенг жамоатчилик ўртасида шов-шувга сабаб бўлган, аммо шарҳловчилар ва кузатувчиларнинг нуқтаи назари фарқ қилади. Баъзи одамлар, сиёсатчи Марказий Осиёдан борган мигрантларни ёмонлаш учун атайлаб ҳаракат уюштирган деб ҳисоблашади. Бундан олдин Матвеев Россия Федерацияси қонун чиқарувчи органининг мажлисларида миллатлараро масалани бир неча бор кўтарган ва Россияда миграция сиёсатини кучайтиришнинг энг фаол лоббичиларидан бири сифатида танилган.

Баъзи кузатувчилар мамлакатда "мигрантларнинг ўзбошимчалиги" ҳолатлари кўпайганидан шикоят қилиб, сиёсатчини қўллаб-қувватлашган. Давлат Думаси депутати Александр Хинштейн ҳам сиёсатчининг фикрига қўшилган.

"Бу ҳолат Самара вилоятида бугунги кунгача давом этаётган мигрантларнинг тартибсизлигига ёрқин мисолдир. Аммо собиқ губернатор "миллатлараро дўстлик" ҳақида бонг урарди. Унинг аянчли миграция сиёсатининг меваларини татиб турибмиз", - деб ёзди у Telegram каналида.