Бу йил Германия Ўзбекистондан 800 нафар ҳамширани ишга қабул қилади. Уларга камида 2,2 минг евро тўланади.
Уларнинг ярми аллақачон тил бўйича ўқитилган ва кетишга тайёр, иккинчи қисми имтиҳонлардан ўтмоқда.
Бу куни кеча Ўзбекистон ва Германия ўртасида имзоланган шартномада кўзда тутилган. Ҳужжатга кўра, темир йўл транспорти мутахассислари ва автобус ҳайдовчилари ҳам Германияга ишлашга юборилади. Уларнинг энг кам ойлик маоши 2,2 минг еврони ташкил қилади.
"Жуда муҳим ҳужжат имзоланди, бу миграция ва мобиллик бўйича ҳукуматлараро битим саналади. Аввало, Германия меҳнат бозорининг тиббиёт соҳасида катта эҳтиёжи бор. Бундан ташқари, бугунги кунда Германиядаги транспорт тизими меҳнат ресурсларига муҳтож. Биз ушбу соҳалар мутахассислари учун немис тили курсларини ташкил қиламиз ва уларни топширгандан сўнг улар Германияда иш билан таъминлаш имкониятига эга бўладилар", - деди Бандлик ва камбағалликни қисқартириш вазири Беҳзод Мусаев.
Унинг сўзларига кўра, ушбу келишув доирасида томонлар виза тартиб-қоидаларини соддалаштириш масаласини ҳам кўриб чиқадилар. Германиядан келган кўплаб иш берувчилар билан ўзбекистонлик мутахассисларни ишга юбориш бўйича шартномалар имзоланади.
