Ўзбекистонда фуқароларни кредит мажбуриятларидан ҳимоя қилишга қаратилган янги механизмлар жорий этилиши мумкин. Олий Мажлис Қонунчилик палатаси томонидан учинчи ўқишда қабул қилинган қонун лойиҳасига мувофиқ, аҳолининг кредит битимлари тузиш ҳуқуқларини назорат қилиш тизими ишлаб чиқилмоқда.
Янги қонун лойиҳасида қуйидаги нормалар кўзда тутилган:
- Кредитлар тақиқини бошқариш: Фуқароларга уларнинг номига кредит расмийлаштиришга қўйилган тақиқни мустақил равишда белгилаш ва бекор қилиш имконияти яратилади.
- Назорат реестри яратиш: Кредит битимини тузиш тақиқланган шахслар реестрини шакллантириш ва унга фуқароларни киритиш тартиби аниқ белгиланади.
- Жавобгарлик чоралари: Белгиланган тақиқни бузган ҳолда тузилган кредит битимлари учун жавобгарлик чоралари қонун ҳужжатларида акс эттирилади.
Мазкур қонун лойиҳаси қабул қилинса, аҳолининг шахсий молиявий хавфсизлигини таъминлаш ва номига ноқонуний кредитлар расмийлаштирилишининг олдини олишга хизмат қилади. Шунингдек, бу механизм фуқароларга ўз молиявий ҳуқуқларини самарали ҳимоя қилиш имкониятини тақдим этади.
Ҳозирги вақтда мазкур ташаббус кенг жамоатчилик томонидан муҳокама қилинмоқда ва уни амалга ошириш механизми аниқлаштирилмоқда.
