АҚШ президенти Доналд Трамп Вашингтондаги йўловчи самолёти ва ҳарбий вертолёт тўқнашуви оқибатида ҳеч ким омон қолмаганини маълум қилди.

Давлат раҳбари самолёт экипажи тўғри ҳаракат қилганини таъкидлади ва авиация хавфсизлигини зудлик билан текшириш ташаббуси билан чиқди.

"Вашингтондаги ҳалокатга вертолёт сабаб бўлди," — деди президент.

Доналд Трамп шунингдек, мамлакатда авиация хавфсизлигини текширишни назарда тутувчи меморандумни имзолади. Ушбу ҳужжат авиация соҳасидаги муаммоларни аниқлаш ва хавфсизликни кучайтиришга қаратилган.

Бундан ташқари, президент ҳаво қатнови билан шуғулланувчи тузилмаларда ходимларни DEI (Diversity, Equality, Inclusion) тамойиллари асосида эмас, балки уларнинг қобилиятлари ва малакасига қараб танлашни назарда тутувчи низомни киритишни таклиф қилди.

Маълумот учун, American Airlines авиакомпаниясининг CRJ700 Bombardier йўловчи самолёти Рейган номидаги Миллий аэропорт яқинида Sikorsky H-60 Black Hawk ҳарбий вертолёти билан тўқнашиб, Потомак дарёсига қулаб тушди.