Тошкентда эксплуатациядан чиқарилган Mercedes Conecto автобуслари қайта жиҳозланиб, электробусларга айлантирилади. Бу жараёнда Испаниянинг UNV компанияси техник ёрдам кўрсатади. Шунингдек, лойиҳа доирасида маҳаллий мутахассислар янги технологиялар билан ишлашни ўрганади.
Мазкур ташаббус Ўзбекистоннинг Испаниядаги элчиси Фаррух Турсунов ва UNV компанияси раҳбари Элой Перес ўртасидаги учрашувда муҳокама қилинди. Томонлар "яшил" транспорт ва автомобилсозлик соҳасида ҳамкорликни йўлга қўйиш масалаларини муҳокама қилди. UNV раҳбарияти шаҳар ичи ва шаҳарлараро автобуслар, микроавтобуслар ишлаб чиқариш бўйича ҳамкорлик қилишга қизиқиш билдирди.
Учрашув натижасида Испания томони "СамАвто" заводи негизида кооперация лойиҳасини босқичма-босқич ишлаб чиқиш таклифини билдирди.
Лойиҳа техник ва экологик жиҳатдан қайта тикланадиган транспорт воситаларини ривожлантиришга қаратилган бўлиб, унинг амалга оширилиши иқтисодий ва экологик самарадорлик нуқтайи назаридан муҳокама қилиниши мумкин.
