АҚШ Давлат департаменти АҚШ Халқаро тараққиёт агентлиги (USAID) фаолиятини расман тугатиш ҳақида қарор қабул қилди. Бу ҳақда “Reuters” хабар берди.

Маълумотларга кўра, USAID’ни қайта ташкил этиш жараёни 1 июлгача якунланади. Агентликнинг айрим вазифалари Давлат департаментига ўтади.

“Хорижий ёрдам миллий манфаатларимизга хизмат қилиши, хавфсизлигимизни мустаҳкамлаши ва иттифоқчиларимиз билан ҳамкорликни кучайтириши керак. Афсуски, USAID ўз миссиясидан четга чиққан. Натижада харажатлар ошган, самарадорлик эса тушиб кетган”, – дейилади хабарда.

Ҳукумат самарадорлиги департаменти (DOGE) агентлик ходимларига барча қонуний асосга эга бўлмаган лавозимлар тугатилиши ҳақида маълум қилган. Шунингдек, ходимларга июль-сентябрь ойларида ишдан бўшаш ҳақида расмий хат юборилиши режалаштирилган.

USAID’нинг стратегик аҳамиятга эга лойиҳаларини Давлат департаменти ўз зиммасига олади, бироқ агентлик ходимлари автоматик равишда департамент таркибига ўтказилмайди.

Эслатиб ўтамиз, аввалроқ федерал судья Теодор Чуанг USAID’ни тугатиш ноқонуний эканини билдирган ва агентлик фаолиятини тиклаш ҳақида қарор чиқарган эди. Шунингдек, Давлат котиби Марко Рубио агентликнинг 80 фоиз дастурлари ёпилишини маълум қилганди.

USAID’ни тугатиш жараёнида 5 минг 200 дан ортиқ шартномалар қайта кўриб чиқилгани айтилмоқда. Шу муносабат билан Давлат котиби бу ислоҳотга ҳисса қўшган Ҳукумат самарадорлиги идорасига миннатдорлик билдирган.