Ўзбекистон Президентининг 2025 йил 5 майдаги ПФ-76-сон Фармонига мувофиқ, таълим сифатини ошириш ва хизматларини такомиллаштириш мақсадида бир қатор муҳим ўзгаришлар киритилди.
2025/2026 ўқув йилидан бошлаб сиртқи таълим шаклига қабул тўхтатилади. Бу билан бирга, кундузги таълимдан бошқа муқобил таълим шакллари (масофавий, кечки, part-time) учун қабул квоталари босқичма-босқич оширилади.
Фармонга кўра, қуйидагилар белгиланган:
Олий таълим муассасаларида муқобил таълим шакллари бўйича умумий қабул квотаси, кундузги таълимга қабул қилинганлар сонининг 50 фоизидан ошмаслиги шарт.
Магистратурада муқобил таълим шакллари асосида илмий-педагогик кадрлар тайёрлашга рухсат берилади.
Олий таълим муассасаларида кредит-модул тизими асосида мақбуллаштирилган кундузги таълим шакли (part-time education) жорий этилади.
Муқобил таълим шаклларига белгиланган лимитдан ортиқ талабаларни қабул қилиш — лицензия талабларини қўпол бузиш сифатида баҳоланиб, таълим муассасаси лицензиясини бекор қилишга асос бўлади.
Яна бир муҳим янгилик:
Ҳар бир олий таълим муассасасида ички таълим сифати назорати бўлимлари ташкил этилади. Ушбу тузилма таълим сифати устидан мунтазам ички аудитни амалга оширади.
