Ўзбекистон ва Россия махсус хизматлари қўшма операциясида меҳнат муҳожирларини террорчилик гуруҳи сафларига ёллашда гумонланган тўққиз киши қўлга олинди. Улардан икки нафари Қашқадарё вилоятида ушланган.

Давлат хавфсизлик хизмати маълумотига кўра, гумонланувчилардан 4 та мобил телефон, 3 та экстремистик адабиёт, 2 та флеш-хотира ва хорижий SIM-карта ашёвий далил сифатида мусодара қилинган. Ҳаммасидан экспертиза учун фойдаланилмоқда.

Терговга кўра, қўлга олинганлар Россияда радикал диний мафкура таъсирига тушиб, турли мамлакатлардан келган мигрантларни ўз сафларига жалб қилган. Улар Telegram орқали видеоконференсиялар ўтказиб, "жаҳон халифалиги" ғояларини тарғиб қилган.

Ҳозирда уларга нисбатан террорчилик тузилмаси тузиш ва унда иштирок этиш айбловлари бўйича тергов ҳаракатлари давом этмоқда. Россия ФСБси бир кун аввал Москвада ўтган ушбу операция ҳақида маълумот берган эди.