Қозоғистоннинг Олмаота шаҳрида суд мамлакатда атом электр станцияси (АЭС) қурилишига қарши чиққан беш нафар фаол – Айдар Мубораков, Нурлан Жаулыбаев, Фозилжон Сидиқов, Нурлан Темирғалиев ва Жанат Қозоқбой устидан ҳукм чиқарди. Улар ҳар бири 4 йилдан озодликни чеклаш жазосига маҳкум этилди. Бу ҳақда Kaztag агентлиги хабар берди.

Айблов ва ҳукм

Прокуратура дастлаб фаолларни 5 йил колонияга юборишни талаб қилган. Тергов маълумотларига кўра, улар ўтган йилнинг 6 октябрида АЭС қурилиши бўйича овоз бериш куни тартибсизликлар уюштиришни режалаштирган, куч ишлатиш, ёнғин чиқариш ва ҳатто қурол ишлатиш орқали ҳокимиятга қаршилик кўрсатиш ниятида бўлган.

Бироқ айбланувчилар бу айбловларни кескин рад этди. Улар фақат АЭС қурилишига қарши ўз фикрларини билдирганини, ҳеч қандай қўзғолон тайёрламаганини айтишди. Адвокатлар ҳам куч ишлатар идоралар келтирган даъволарни тасдиқловчи далил йўқлигини таъкидлади.

Ҳукм эълон қилингач, суд залида йиғилганлар фаолларга олқишлар билан қўллаб-қувватлов кўрсатган.

Норозиликлар тарихи

2023 йилда референдум арафасида Олмаота, Ақтобе, Павлодар, Петропавловск, Орал ва Чимкент шаҳарлари ҳокимликлари АЭСга қарши митингларга рухсат бермаган. Шу билан бирга, одамлар барибир чиқишлар ўтказган. Олмаотада полиция 10 дан зиёд фуқарони ушлаб кетган, улардан беш нафари кейинчалик суд олдига олиб келинган.

Марказий сайлов комиссияси маълумотича, ўтган йилнинг 7 октябрида ўтказилган умумхалқ овоз беришда 71%дан ортиқ аҳоли АЭС қурилишини қўллаб-қувватлаган.

Қозоғистон ҳукумати мамлакатдаги биринчи атом электр станциясини қуриш бўйича халқаро консорциум раҳбари сифатида Россиянинг “Росатом” давлат корпорациясини танлаган. Лойиҳа расмий қарор қабул қилинганидан бери жамоатчилик орасида қаттиқ баҳс ва норозиликларга сабаб бўлиб келмоқда.