АҚШ президенти Доналд Трамп мамлакат собиқ вице-президенти Камала Ҳаррисни Махфий хизмат ҳимоясидан маҳрум этди. Бу ҳақда CNN манбалари хабар берди.

Асосий қарор

1 сентябрдан бошлаб Ҳаррисга нисбатан барча хавфсизлик чоралари тўхтатилди. Бу қарор Трампнинг “Ички хавфсизлик вазирига меморандум” хатида расман эълон қилинди.

Орқа фон

Федерал қонунга кўра, собиқ вице-президентлар лавозимни тарк этгач, 6 ой давомида ҳимоядан фойдаланиш ҳуқуқига эга. Ҳаррис учун бу муддат 21 июлда тугаган эди. Бироқ Жо Байден президентликдан кетишидан сал аввал, унга қўшимча бир йиллик ҳимоя муддатини берганди.

Трамп ушбу фармонни бекор қилиб, ҳимояни тўхтатиш ҳақида қарор чиқарди.

Китоб тақдимоти билан боғлиқ

Ҳаррис қўриқчиларсиз қолиши арафасида сафарга чиқиши кутиляпти. 23 сентябрда нашр этиладиган “107 кун” номли мемуар китобида унинг қисқа давом этган президентлик кампанияси ёритилади. Трампнинг қарори айнан шу сафарлар билан боғлиқ деган тахминлар бор.

Ҳарриснинг муносабати

Камала Ҳарриснинг катта маслаҳатчиси Кирстен Аллен бу ҳолатга изоҳ берди:

“Ҳаррис АҚШ Махфий хизматига профессионаллиги ва хавфсизликни таъминлашдаги фидойилиги учун миннатдор”, — деди у.

Нима учун муҳим?

• Барча собиқ президентлар умрбод қўриқланади, собиқ вице-президентларда эса бу ҳуқуқ чекланган.

• Ҳарриснинг янги китоб тақдимоти АҚШ сиёсий муҳитида катта муҳокамага сабаб бўлиши кутиляпти.

• Трампнинг қарорини баъзи таҳлилчилар сиёсий қадам сифатида баҳоламоқда.