Ўзбекистонда шахсий эҳтиёж учун олиб кирилган автомобиллар эндиликда Пискент автополигонида синовдан ўтмайди. Бош вазир ўринбосари Жамшид Хўжаев имзолаган ҳукумат ҳужжатига кўра, 2 сентябрдан автосиновлар расман бекор қилинди. Бу қарор Жаҳон савдо ташкилоти бўйича идоралараро комиссия йиғилишида тасдиқланган.
Асосий ўзгаришлар
Шахсий эҳтиёж учун олиб кирилган битта автомобилдан “электромагнит мослашувчанлик” ва “салон ҳавосида ажратиладиган захарли моддалар” бўйича синов талаб қилинмайди.
Юридик шахсларга транспорт турини маъқуллаш ҳужжатининг амал қилиш муддати 3 йилдан 5 йилгача узайтирилди.
Агентликка хориждан олиб келинаётган машиналар сифати устидан назоратни кучайтириш вазифаси топширилди.
Нега полигон бекор қилинди?
Техник жиҳатдан тартибга солиш агентлигига кўра, синов амалиёти расмий дистрибютор ва сервис марказлари сони кўпайгани, шунингдек, истеъмолчиларда улар билан ишлаш амалиёти шакллангани учун бекор қилинди.
Бироқ автосинов тизими автомобил импорти статистикасига мутлақ таъсир кўрсатмаган:
2024 йилда автомобил импорти 1,9 млрд доллардан 1,3 млрд долларгача қисқарган.
2025 йилнинг биринчи чорагида эса ўтган йилнинг шу даврига нисбатан 2,7 баробар камайган.
Шу билан бирга, жисмоний шахслар томонидан олиб кирилган машиналар сони 2024 йилнинг биринчи ярим йиллигида ўтган йилга нисбатан 2 693 тага кўпайган.
Қандай таклифлар берилди?
Рақобат қўмитаси ва Иқтисодиёт вазирлигига маҳаллий ишлаб чиқарувчилар, расмий ва норасмий дилерлар ўртасидаги нарх тафовутларини таҳлил қилиш ва тартибга солиш вазифаси топширилди.
Мувофиқликни баҳолаш марказларига хусусий секторни жалб қилиш ҳамда аккредитация тизимини такомиллаштириш режалаштирилмоқда.
Агентлик истеъмолчиларнинг мурожаатларига тўлиқ жавоб бериш ва бозорда назоратни кучайтиришга масъул этилди.
Жамоатчилик фикри
Иқтисодчи Отабек Бакиров бу қарорда ҳали ҳам “сюрпризлар” бўлиши мумкинлигини айтса, блогер Умид Ғофуров “қандай тартибга солинишини билмадим-у, лекин нархлар тушмаслиги аниқ” дея изоҳ берди.
Орқа фон
Эслатиб ўтамиз, 2024 йил 1 ноябрдан бошлаб импорт қилинадиган автомобилларни текшириш амалиёти божхона ҳудудидан Пискент туманидаги полигонга кўчирилганди. Бу эса узун навбатлар ва автовладельцалар учун жиддий ноқулайликларга сабаб бўлган эди.
