Хорватияда  ноодатий ҳодиса содир бўлди. Маҳаллий News Bar портали ёзишича, маст одамни чаққан илон алкоголдан заҳарланиб ўлган. 42 ёшли Штеф Радулич иш йиғилишида ичимликка берилиб, уйига пиёда қайтаётган пайтда йўлда илон чақиб олган.

Унинг сўзларига кўра, илон чаққандан кейин ғалати ҳаракат қила бошлаган — бошини ерга уриб, мажолсиз ҳолда ўрмалай олмай қолган. Радулич илонни кўтариб, ветеринарга олиб борган, лекин ҳайвон шундаёқ ўлган бўлган. Кейинги экспертиза илон қонидаги алкогол миқдори 5,1 грамм/килограмм бўлганини кўрсатган — бу доза ҳатто инсон учун ҳам ўлимга олиб келади.

Табиийки, бу хабар ижтимоий тармоқларда тез тарқалди. Аммо фактчекинг нуқтаи назаридан масалага жиддий ёндашганда, ҳодиса ҳақиқий эмаслигини англаш мумкин. News Bar — Хорватиянинг сатира ва юмор йўналишидаги медиа портали бўлиб, у воқеаларни реал хабар сифатида эмас, балки ҳазил услубида ёритади. Демак, “илон маст одамдан заҳарланиб ўлди” воқеаси реал эмас, балки одамларни ўйлантиришга мўлжалланган сатиралардан биридир.

Шу билан бирга, биологлар фикрича, илон организмида алкогол моддалари тезда метаболизмга учрайди ва одамни чақиш орқали унга юққан миқдор ўлимга сабаб бўлиши эҳтимолсиз. Ҳақиқий ҳаётда бундай ҳодиса рўй бериши илмий жиҳатдан деярли мумкин эмас.

Штеф Радуличнинг “илон заҳари таъсир қилмади, чунки спирт уни нейтраллаштирди”, деган гапи ҳам илмий асосга эга эмас. Медицинада алкогол заҳар таъсирини йўқотмайди, аксинча, жигар, буйрак ва асаб тизимига қўшимча зарар етказади.

Сатира орқали берилган бу хабар одамларга жиддий хулоса чиқаришга сабаб бўлиши керак: спиртли ичимликлар ҳеч қачон “ҳимоя воситаси” эмас, балки инсонни секин ўлдирувчи заҳардир. Ҳатто илон ҳам бундай дозадан омон қолмагани шубҳасиз рамзий маъно касб этади.