UzAuto Motors 3 ноябр куни сотувга қўйган 100 мингта Chevrolet Cobalt’нинг 7 кунлик тўлов муддати якунлари бўйича маълумотлар эълон қилинди: бор-йўғи 20 минг 833 та автомобил учун тўлов амалга оширилган, қолган шартномалар бекор қилинган. Бу ҳолат компания томонидан автомобилларга ҳақиқий эҳтиёжсиз шартномалар кўп тузилгани билан изоҳланди.
Шундан келиб чиқиб, UzAuto Motors Cobalt’ларни кейинги сотувини расмий дилерлик марказлари орқали амалга оширишга қарор қилди. Энди онлайн платформа орқали харид қилмаган истеъмолчилар дилерлик марказларидан автомобилларни тўғридан-тўғри харид қилиши мумкин. Барча сотувлар ягона ахборот тизими орқали расмийлаштирилиб, ҳар бир шартнома QR-код билан таъминланади.
20 ноябрь ҳолатига кўра, дилерлик тармоғига 2 624 та Cobalt етказилган ва улардан 1 969 таси мижозларга топширилган. Қолган 6 мингга яқин автомобил дилерларга етказиш жараёнида. UzAuto Motors онлайн платформаси орқали сотилган машиналар белгиланган график асосида ўз вақтида топширилаётганини таъкидлади. Ноябрь ойида топширилиши керак бўлган машиналарнинг ярмидан кўпи мижозларга берилган, декабрь ва январь ойларига мўлжалланган етказиб беришлар эса 15 декабрга қадар тўлиқ якунланиши режалаштирилган.
Компания тарқалган коррупция даъволарини рад қилди, бу хабарларда ҳеч қандай далил йўқлиги, текширилмаган миш-мишлар компания ва расмий дилерлар обрўсига зарар етказиши таъкидланди. Шу боис UzAuto Motors ҳар қандай асоссиз фаразлар ва миш-мишларни тарқатмасликни сўради.
3 ноябр куни сотувга қўйилган Cobalt’лар 2 соат 26 дақиқада 100 мингта шартнома тузилгани билан эътиборни тортиб, уларнинг 99 фоиздан ортиғи жисмоний шахслар томонидан харид қилингани қайд этилган. Ушбу рақамлар автомобилларга юқори талаб ва сотув жараёнида истеъмолчи эҳтиёжи ҳамда реал тўловларнинг фарқини кўрсатади.
UzAuto Motors’нинг дилерлик орқали тўлов амалга ошмаган автомобилларни қайта сотувга чиқариш қарори бозор самарадорлиги ва истеъмолчи эҳтиёжларини яхшироқ таъминлашга қаратилган бўлиб, онлайн ва анъанавий каналлар орқали харид имкониятини мослаштириш йўли билан амалга оширилмоқда.
