Фото: Anadolu Agency via Getty Images
Декабр ойи охирида Янги Зеландиянинг Веллингтон шаҳридан жўнаб кетган «Viking Orion» круиз кемасининг 800 нафар йўловчиси бир ҳафтадан буён қирғоққа чиқа олмаяпти. Кема корпусининг биологик ифлосланиши туфайли лайнерни Янги Зеландия ва Австралия портларининг бирортаси қабул қилмаяпти.
Дастлаб, кема Крайсчёрч ва Данидин, сўнгра Аделаида ва Ҳобарт портларига киритилмади.
Аксарияти америкаликлар бўлган сайёҳлар вазиятдан ниҳоятда норози ва круиз ташкилотчилари можарони бартараф қилиш учун барча чораларни кўрмоқда.
«Viking» ҳар бир мижозга маршрут ва круиз режасидаги ўзгаришларни моддий қоплаб беришга ҳаракат қилади», деди кема штурмани.
Биологик ифлосланиш - микроорганизмлар, замбуруғлар ва сув ўтларининг кема тагида тўпланиши. Бу хавфли, чунки маълум бир экологик тизимга бегона флорани, шу жумладан микрофлорани киритиши мумкин.
Кеманинг портга киришига рухсат берилишидан олдин одатда биологик ифлосланиш даражаси ўрганилади. Муаммони ҳал қилиш учун кема корпусини тозалайдиган ғаввосларнинг профессионал хизмати керак бўлади.
