Афғонистон Ислом Амирлиги (АИА) раҳбари Ҳайбатулло Охунзода янги фармонга имзо чекди. Унга кўра, уйлар шундай лойиҳалаштирилиши ва қурилиши лозимки, деразалар орқали аёлларнинг кўриниши тўлиқ чекланади.

Янги талаблар
Фармонга мувофиқ, турар-жой биноларида қўшни уйлардан аёлларнинг кўринишини олдини олиш мақсадида деразаларни махсус қоидаларга амал қилиб ўрнатиш шарт. Агар деразалар ошхона ёки бошқа хоналарга қаратилган бўлиб, бу ерда аёллар бўлиши мумкин бўлса, бундай биноларнинг қурилиши тақиқланади. Шунингдек, деразалар остида одам бўйига тенг деворлар қуриш ёки бошқа кўздан ҳимоя қилувчи чоралар кўриш талаб этилади.

Расмий изоҳлар
“Толибон” ҳукумати сўзловчиси Забиҳуллоҳ Мужоҳиднинг таъкидлашича, аёлларнинг ошхона ёки ҳовлида кўриниши “беҳаёликка сабаб бўлиши мумкин”. Шу боис шаҳар ҳокимияти қурилиш объектларини назорат қилиш ва белгиланган ҳудудларда деразаларни қайтадан кўриб чиқишни талаб қилмоқда.

Аёлларга нисбатан чекловлар давоми
2021 йилда “Толибон” ҳокимиятга келганидан бери аёллар ҳуқуқлари кескин чекланган. Уларга таълим олиш, эркак ҳамроҳлигисиз саёҳат қилиш, жамоат жойларида бўлиш, ишлаш ва ҳатто боғларга ташриф буюриш тақиқланган. Шунингдек, гўзаллик салонлари ёпилган, аёлларга паранжисиз кўчада юриш ман қилинган.

Анъанавий аҳлоқ меъёрларига боғланган фармонлар
Янги қурилиш қоидалари “анъанавий аҳлоқ меъёрларини сақлаш” мақсади билан асосланганлиги таъкидланмоқда. Бироқ, бу чоралар инсон ҳуқуқлари ҳимоячилари томонидан танқид қилинади ва уларни гендер тенгсизлиги ва аёлларнинг ижтимоий ҳаётдан четлатилиши сифатида баҳоланмоқда.

Фармонга қанчалик амал қилинишини ва унинг ижтимоий ҳаётга таъсирини вақт кўрсатади.