Франциянинг Airbus авиақурилиш гиганти тарихий натижа қайд этди — A320 самолётлар оиласи дунёдаги энг кўп ишлатилаётган йўловчи лайнерга айланди. Бу ҳақда Cirium таҳлилий агентлиги маълумотларига таянадиган Reuters хабар берди.
Таҳлилчиларнинг маълумотларига кўра, 1988 йилдан бери ишлаб чиқарилаётган A320 сериясига мансуб самолётлар сони 12 260 тага етди. Бу кўрсаткич билан Airbus илк бор кўп йиллик рақиби — Boeing 737 сериясини орқада қолдирди. Шу тариқа A320 дунёдаги энг оммавий йўловчи самолёти мақомини қўлга киритди.
A320нинг етакчиликка чиқиши Boeing учун оғир шароитда содир бўлди. Компания сўнгги йилларда 737 MAX моделлари билан боғлиқ техник муаммолар ва хавфсизлик инқирозлари сабаб ишлаб чиқариш ва етказиб беришда жиддий кечикишларга дуч келди. Бу ҳолат авиакомпанияларнинг катта қисмини Airbus моделларига ўтишга ундади.
Airbus бугунги кунда авиакосмик соҳадаги йирик трансмиллий концернлардан бири саналади. Унга Airbus SAS (йўловчи самолётлар ишлаб чиқариш), Airbus Defence and Space (ҳарбий ва космик технологиялар) ҳамда Airbus Helicopters (вертолётлар ишлаб чиқариш) бўлинмалари киради. Европа концернининг бу муваффақияти технологик рақобатда янги босқични бошлади.
Фактчекинг маълумотларига кўра, 2025 йил сентябрь ҳолатига A320 оиласи 12 260 та самолётдан иборат бўлса, Boeing 737 сериясидаги самолётлар сони 12 254 тага етган. A320нинг замонавий версияси — A320neo ёқилғи тежамкорлиги ва экологик самарадорлиги билан бозорда етакчиликни мустаҳкамламоқда. Boeing эса ҳозирда янги модернизация дастури устида ишламоқда, аммо етказиб беришдаги кечикишлар рақобатдаги тафовутни оширмоқда.
Airbus’нинг бу ютуғи нафақат авиация соҳасидаги рақобат рамзи, балки глобал иқтисодиётда Европа технологияларининг нуфузи ошиб бораётганини ҳам англатади.
