5-noyabr kuni o'tgan saylovda AQShda prezidentlikka respublikachi Donald Tramp saylangan. Tramp o'zini bir necha soat oldin g'olib deb e'lon qilgan edi. Senat ham respublikachilar qo'liga o'tgan.

To’rt yil oldin saylovda mag’lubiyatini tan olmagan Donald Tramp Qo’shma Shtatlarning navbatdagi rahbari bo’ladi. Qator jinoyatlarda ayblanib sudlangan, suiqasdlardan omon qolgan sobiq rahbar yana Oq uyga qaytmoqda.

Tramp prezident sifatida federal hukumatni tubdan o’zgartirishga va’da bergan. Floridada o’z tarafdorlari bilan uchrashar ekan, Tramp “misli ko’rilmagan, kuchli mandatni” qo’lga kiritganini ta’kidladi.

Prezidentlikka saylanish uchun nomzod 538 superdelegatga ega Saylov kollegiyasining kamida 270 ovozini olishi kerak. Kollegiya ovozlari shtatda ko'pchilik kimga ovoz bersa, shunga ketadi. Bir necha shtatda ovozlar hamon hisob-kitob qilinayotgan bo’lsa-da, Tramp mamlakatning navbatdagi prezidenti bo’lish uchun zarur 270 ovozni allaqachon qo’lga kiritgan.

Bu bilan Donald Tramp ayol raqibini ikkinchi marotaba mag’lub etmoqda. Amaldagi Vitse-prezident Kamala Harris saylovga bir necha oy qolganda demokratlar nomzodi sifatida Jo Baydenning o’rnini egallagan edi.

Donald Tramp 1892-yildan beri AQShda ikkinchi marta saylana olmay keyin yana harakat qilib, buning uddasidan chiqqan prezident bo'ldi. Shuningdek, u bu davlat tarixida sudda jinoyatchi deb topilsa-da, rahbarlikka saylangan shaxs. 78 yoshli Tramp Oq uyga saylangan eng keksa rahbar hamdir.