Ушбу савол юзасидан ССВ Матбуот хизмати Тошкент шаҳар тиббий маслаҳат диагностика маркази директори, тиббиёт фанлари доктори Орифжон Ариповга мурожаат қилди.

Лаборатор таҳлиллар инсон организмидаги аъзоларнинг касалликдан кейинги функционал ҳолатини баҳолаш ва асоратларни аниқлашга ёрдам беради. COVID-19дан тузалган беморларда асосан кўпроқ шикастланадиган 3 та тизимга эътибор қаратиш керак: ўпка, буйрак ва бош мия фаолияти.

Агар беморда ҳансираш белгилари икки ойдан кўп давом этса ва динамик кузатувда камаймаса, кардиолог маслаҳати ва юрак УТТ текшируви ўтказилиши лозим.

Умумий қон таҳлили — энг тез, оддий ва информатив текширув усули. Бунда, аввало, аллергик компонентни намоён қилувчи эозинофилларни аниқлашга эътибор берилади. Шу билан бирга, организмдаги яллиғланиш (лейкоцит, лимфоцит, ЭЧТ) ва камқонлик ҳолатлари ҳам баҳоланади.

Даволаш пайтида кўп ва узоқ вақт давомида антибактериал терапия қабул қилган беморларда учрайдиган асоратлардан бири — псевдомембраноз колит. Бунда сабабсиз ич кетиш, қориндаги давомли оғриқлар кузатилади. Бундай вазиятда беморни чуқурроқ текшириш, тор мутахассис маслаҳатига зарурат туғилади.

Яллиғланиш белгилари:

Умумий қон таҳлили + ЭЧТ, лейкоцитар формула, С-реактив оқсил, ферритин орқали интерпретация қилинади.

Қон ивиш тизими:

D-димер, Протромбин, фибриноген;

Организмни витамин D билан тўйинганлигини баҳолаш:

25-OH витамин D;

Юрак ҳолати:

Лактатдегидрогеназа, натрий, калий, хлор, кальций (Са2+), магний;

Жигар ҳолати:

Аланин-аминотрансфераза, аспартат-аминотрансфераза, умумий билирубин;

Буйрак ҳолати:

Креатинин, мочевина, оқсил ва углевод алмашинуви, глюкоза, альбумин, цистатин С;

Аутоиммун жараёнларни ўз вақтида аниқлаш:

Ядро антигенларига антитана, скрининг таҳлиллари орқали амалга оширилади.