Аввалроқ Токиода бир эркак поезд йўловчиларига пичоқ билан ҳужум қилгани ҳақида хабар бергандик.

Япония пойтахти ҳудудида поездга ўт қўйиб, одамларга пичоқ билан ташланган ҳамда бунинг натижасида камида 17 кишининг жароҳатланишига сабаб бўлган йигит ўлим жазосига ҳукм қилинишини хоҳлагани учун бир неча кишини ўлдирмоқчи эканлигини тан олди.

«Мен одам ўлдириб, ўлимга ҳукм қилинишни хоҳлагандим. Aгар икки кишидан ортиқ одамни ўлдирганимда, албатта ўлимга маҳкум бўламан деб ўйладим», — дея Киодо агентлиги сўроқ пайтида 24 ёшли Кёта Хатторининг кўрсатмаларидан иқтибос келтирди.

Якшанба куни кечқурун Токио полицияси Япония пойтахти ҳудудида поездда пичоқ билан ҳамла қилган, сўнг ёнувчи суюқликни тўкиб юборган ва уни ёқиб юборган йигитни ҳибсга олди. Вагонга хлорид кислотаси сепилгани ҳақида ҳам хабарлар тарқалди.

Натижада бир нечта ўриндиқлар ёниб кетди. Охирги маълумотларга кўра, ҳодиса оқибатида камида 17 киши жабрланган. Улардан бири — кекса одамда ҳаёт белгилари йўқ.

Телеканал маълумотларига кўра, Кэйо линиясидаги поезд ҳозирда пойтахт ҳудудидаги Тёфу шаҳридаги Кокурё станциясида тўхтатилган.