Internetda sehrli aralashma yordamida oq sochlardan qutulishning samarali usuli reklama qilinmoqda.

Aytishlaricha, bir qoshiq asal, kastor yog‘i, konyak va tuxum sarig‘ini aralashtirib, soch ildizlariga suriladi va besh daqiqadan keyin yuvib yuboriladi. Go‘yoki to‘rtinchi qo‘llashdan so‘ng natijani ko‘rish mumkin.

HUKM: YOLG‘ON

Oq sochlarning paydo bo‘lishi yoshga doir o‘zgarishlar, genetika hamda stress, kasallik va vitamin yetishmasligi kabi boshqa omillar bilan bog‘liq.

Asal va boshqa ingredientlar melanin pigmentining shakllanishini o‘zgartirish uchun hujayra darajasida soch ildizlariga ta’sir qilmaydi.

Sochlar murakkab tuzilishga ega va asal kabi tabiiy bo‘yoqlar faqat sirtda qoladi. Ular sochlarga vaqtinchalik yorqinlik berishi mumkin, lekin uning tabiiy rangini o‘zgartirmaydi.

Shunga qaramay…

Asal oq sochlardan xalos qilmasa ham, sochga foydali bo‘lishi mumkin:

•  Asal sochni yumshoq va yorqinroq qiladigan namlovchi xususiyatlarga ega.
•  Uning tarkibida sochlarning holatiga ijobiy ta’sir ko‘rsatadigan ko‘plab vitaminlar va minerallar mavjud.
•  Asal antibakterial xususiyatga ega, bu bosh terisi kasalliklari bilan kurashishga yordam beradi.

Agar siz oq sochlar paydo bo‘layotganidan xavotirda bo‘lsangiz, trixolog shifokorga murojaat qilishingiz kerak.

U sababni aniqlaydi va davo usulini tanlaydi.

Bundan tashqari, oq sochlarni yopishga yordam beradigan, sochlarni bo‘yashning turli xil kosmetik vositalari mavjud.