OAVda O‘zbekiston fuqarolari endi xorijga chiqish pasportini pochta orqali olishlari mumkinligi haqida xabar berilgandi (1, 2, 3).
Nashrlarda Adliya vazirligiga, ayrim ommaviy sahifalarda esa davlat rahbarining “topshirig‘i”ga havola qilinadi.
Gap prezidentning 2024-yil 4-noyabrdagi qarori haqida bormoqda. Unga muvofiq, fuqarolarning xorijga chiqish tartibi to‘g‘risidagi nizomga o‘zgartirishlar kiritildi.
Shuningdek, pochta orqali yetkazib berish xizmatini tanlash mumkinligi qayd etilgan. Topshirish joyidagi xodim tayyor biometrik pasportni pochta xizmati xodimiga topshiradi, so‘ngra u yetkazib berishni tasdiqlash uchun foydalanuvchi bilan telefon orqali bog‘lanadi va hujjatni ko‘rsatilgan manzilga jo‘natadi.
Qabul qiluvchi qo‘ng‘iroqlarga javob bermasa, pasport eng yaqin pochta bo‘limida qoldirilishi mumkin. Toshkent shahri va viloyatlar markazlarida yetkazib berish bir ish kuni, boshqa hududlarda esa ikki ish kunigacha davom etadi.
Haqiqatan ham Adliya vazirligi kanalida xorijga chiqish pasportlarini pochta orqali yetkazib berish haqida xabar paydo bo‘lgandi.
Biroq, shunga o‘xshash rejalar o‘tgan yili tuzilgan edi.
HUKM: BAJARILMAGAN
O‘shanda 2023-yil 1-oktabrga qadar ID kartalar va xorijga chiqish pasportlarini pochta aloqasi orqali egalariga yetkazib berish jarayoni yo‘lga qo‘yilishi aytilgan edi.
Bu haqda Vazirlar Mahkamasining 2023-yil 31-iyuldagi Migratsiya va fuqarolikni rasmiylashtirish, shuningdek, avtomototransport vositalarini davlat ro‘yxatidan o‘tkazish va ro‘yxatdan o‘tkazish davlat raqam belgilarini berish bo‘yicha davlat xizmatlarini ko‘rsatish tartibini takomillashtirish to‘g‘risidagi qarorida keltirilgandi.Shu bilan birga, xorijga chiqish pasportini pochta orqali yetkazib berish xizmatining imkoniyatlari yangi hujjat kontekstida yana muhokama qilindi. Ushbu xizmat real vaqtda ishga tushiriladimi yoki yo‘qmi, ijrochilarga bog‘liq. YaIDXPda xorijga chiqish pasportini berish bo‘limida hali bunday funktsiya mavjud emas.
