Давлат хизматлари агентлиги Жиззах вилоят бошқармаси томонидан ходимлар ўртасида соғлом турмуш тарзини тарғиб этиш мақсадида ҳафтанинг маълум кунларида мини футбол, стол тенниси ва гимнастика турлари бўйича машғулотлар ўтказиш йўлга қўйилди.

Бу Ўзбекистон Республикаси Президентининг 2020 йил 30 октябрдаги ПФ-6099-сон “Соғлом турмуш тарзини кенг тарғиб этиш ва оммавий спортни янада ривожлантириш чора-тадбирлари тўғрисида”ги Фармони ва Адлия вазирининг “Адлия органлари ва муассасаларида соғлом турмуш тарзини кенг тадбиқ этиш ва оммавий спортни янада ривожлантириш тўғрисида”ги буйруғи ижросини таъминлаш мақсадида ташкил этилмоқда.

Аслида гап буйруқлар ижросида ҳам эмас. Шунчаки ходимларнинг ишдан бўш вақтини мазмунли ўтказиш, иш вақтидан сўнг барча ходимларни жисмоний тарбия орқали саломатлигини мустаҳкамлашига эришишдир. Бу орқали ходимлар ўртасида жамоавийлик шаклланиб, ишдаги унумдорлик ҳам ортиши шубҳасиздир.

Жорий ҳафтадан бошлаб ҳафтанинг сешанба ва пайшанба кунлари Миллий университетнинг Жиззах филиали спорт залида мини футбол бўйича машғулотлар бошлаб юборилди. Дастлабки машғулот кунларида бошқарма, Жиззах шаҳар ҳамда Ш.Рашидов туман ДХМ ходимлари 3 та жамоага бўлинган ҳолда майдонда беллашдилар.

Наврўз умумхалқ байрами арафасида эса тизим ходимлари ўртасида “ДХА кубоги” мусобақаларини ўтказиш режалаштирилган.

ДХА Жиззах вилоят бошқармаси Ахборот хизмати