Президент аҳоли пунктлари учун бош режаларни ишлаб чиқиш ва ноқонуний ва рухсатсиз қурилишларни аниқлаш ва тартибга солиш тизимини йўлга қўйишни буюрган.
Бугун президент ҳузурида бўлиб ўтган йиғилишда ўтган йили Ўзбекистонда 4 мингга яқин ноқонуний қурилган объектлар аниқлангани таъкидланган. Бундан ташқари, сўнгги икки йил ичида кўп қаватли уйларга туташ ҳудудларда 7 мингдан ортиқ ўзбошимча қурилишлар пайдо бўлган, 5 мингта ҳолатда бундай объектлар ва иншоотлар умумий фойдаланиш жойларини эгаллаб олган.
Давлат раҳбари ўзбошимча ва ноқонуний равишда қурилган объектларни тартибга солишнинг мутлақо янги тизимини жорий этиш бўйича топшириқ берган.
Ноқонуний қурилган обектларни аниқлаш билан Қурилиш вазирлиги, Кадастр агентлиги ва "Ўзбеккосмос" агентлиги раҳбарлигидаги республика комиссияси шуғулланади.
Комиссия ҳудудларнинг аэро ва космик фотосуратларини таҳлил қилади, олдинги суратлар билан номувофиқликларни аниқлайди ва ноқонуний қурилишлар рўйхатини тузади.
Таъкидлаш керакки, ер қонунчилиги бузилишини аниқлашнинг ушбу усули 2022 йилда Тошкент ва Тошкент вилоятида тажриба сифатида қўлланила бошланган. Бу Шавкат Мирзиёевнинг қарори билан кўзда тутилган эди.
Бундан ташқари, Қурилиш вазирлиги бу йил вилоят ҳокимлари билан биргаликда 170 та шаҳар ва посёлкалар, шунингдек, кейинги йили уларнинг камида 300 таси учун бош режалар ишлаб чиқиши керак.
Ҳар бир режа аҳоли томонидан муҳокама қилиниши керак, уларни амалга ошириш жамоатчилик назорати остида амалга оширилиши лозим. Бунинг учун "Менинг ҳудудим" платформаси ишга туширилди, унинг ёрдами билан шаҳарсозлик ҳужжатларини ишлаб чиқишда жамоатчилик фикри ўрганилади ва овоз берилади.
