Тошкент вилоятининг Паркент тумани “Кумушкон” МФЙда жойлашган Ўзбекистон Фанлар академиясига қарашли Физика-Қуёш институти кунига мингдан ортиқ маҳаллий ва хорижий туристларни қабул қилмоқда.
Ўзбекистон Республикаси Фанлар Академияси С. А. Азимов номидаги “Физика-Қуёш” илмий-ишлаб чиқариш бирлашмаси материалшунослик институти 1981-1987 йиллар оралиғида қурилган ва фойдаланишга топширилган бўлиб, ҳозирги кунда бир нечта йўналишларда илмий тадқиқотлар олиб борилади. Ҳаттоки, қурилиш ишларини кўздан кечириш мақсадида, Ўзбекистон ССР Компартияси МҚнинг Биринчи Котиби Шароф Рашидов шахсан ташриф буюрган.
Тошкент шаҳридан 40 км узоқликда жойлашган бундай иншоотдан дунёда атиги иккита бўлиб, бири Францияда ва яна бир Тошкент вилоятининг Паркент туманида жойлашган.
Қизиқарли жиҳати шундаки, бундан 5-10 йил олдин стратегик объект сифатида қўриқланадиган ушбу институтда жойлашган қуёш печининг баландлиги 68 метрни ташкил қилиб, 3000-4000 °С иссиқликни бера олади ва бу технология дунёда ягонадир.
Бундан ташқари, институт ўзининг ноёб шишали қандиллари билан эътиборни жалб қилади. Ушбу турдаги қандиллар Ўзбекистонда 5 та бўлиб, унинг 4 таси мана шу институтида, қолган биттаси эса Тошкент метрополитенининг “Космонавтлар” бекатида жойлашган.
“Физика-Қуёш” илмий-ишлаб чиқариш бирлашмаси материалшунослик институтида бугунги кунда:
- Энергетика;
- Мудофаа;
- Металлургия;
- Коинотшунослик;
- Инновация;
- Заргарлик;
- Tуризм каби бир нечта соҳаларда хизмат кўрсатади ҳамда маҳсулот ишлаб чиқаради.
Таъкидланишича, “Катта Қуёш Қурилмаси” ноёб илмий объекти илмий туристик объект сифатида кўрилмоқда ва кунига 400-1000 нафардан ортиқ маҳаллий ҳамда хорижий туристларни қабул қилмоқда. Институтга киришда пуллик хизмат жорий қилинган бўлиб:
а) мактаб ўқувчилари учун – 5 минг сўм;
б) Олий таълим муассасалари талабалари учун – 10 минг сўм;
c) ва бошқа сайёҳлар учун – 15 минг сўмни ташкил қилади.
Сайёҳлар учун 8 нафар Гидлар ҳамроҳлик қилади ва бунинг учун алоҳида штатлар ажратилган.
Умуман олганда, Ўзбекистон Республикаси Фанлар Академияси С. А. Азимов номидаги “Физика-Қуёш” илмий-ишлаб чиқариш бирлашмаси материалшунослик институти ноёб илмий объекти ноёб технология ва илмий инновацияга бой туристик ҳудуд саналади.
Сизни ҳам ушбу “Катта Қуёш Қурилмаси” ноёб илмий объектига ташриф буюришингизни таклиф қиламиз.
