Қарши шаҳридаги 1-мактаб ўқувчиси синфхонада сув солинган челакка ҳожатини чиқарган. Ҳолат акс этган видео интернетда тарқалгач, ўқувчининг ота-онаси жаримага тортилди. Маълум бўлишича, ота вилоят прокуратурасида масъул лавозимда ишлайди.

Қарши шаҳар 1-ихтисослаштирилган умумий ўрта таълим мактабининг юқори синф ўқувчиси мактабда белгиланган ички тартиб ҳамда одоб-ахлоқ қоидаларини бузган ва синфхонада ножўя хатти-ҳаракатлар содир этган.

Қашқадарё вилоят ИИБ матбуот хизматининг маълум қилишича, бу ҳолатни унинг синфдоши видеотасвирга олиб, ижтимоий тармоқларда тарқатган.

Ҳолат юзасидан Қарши шаҳар ИИО ФМБ томонидан вояга етмаган ўқувчиларнинг ота-оналарига нисбатан маъмурий жавобгарлик тўғрисидаги кодекснинг 47-моддаси 1-қисмида кўрсатилган ҳуқуқбузарлик аломатлари мавжудлиги сабабли маъмурий баённома тузилиб, тўпланган ҳужжатлар вояга етмаганлар ишлари бўйича Қарши шаҳар идоралараро комиссияга тақдим этилган.

Комиссия ўқувчининг ота-онасини МЖтКнинг 47-моддаси 1-қисми билан айбли деб топиб, уларга нисбатан маъмурий жазо қўллаган.

Daryo хабарига кўра, ўқувчининг отаси Қашқадарё вилояти прокуратурасида масъул лавозимда ишлайди. Бу маълумотни тасдиқлаган вилоят Халқ таълими бошқармаси ахборот хизмати раҳбари Жавоҳир Рустамов прокуратурада фаолият юритувчи отанинг қанча миқдорда жаримага тортилганидан бехабарлигини билдирган.

Маъмурий жавобгарлик тўғрисидаги кодекснинг 47-моддаси (Болаларни тарбиялаш ва уларга таълим бериш борасидаги мажбуриятларни бажармаслик) 1-қисмига кўра:

ота-оналар ёки уларнинг ўрнини босувчи шахслар томонидан вояга етмаган болаларни тарбиялаш ва уларга таълим бериш борасидаги мажбуриятларни бажармаслик, шу жумладан вояга етмаган болаларнинг маъмурий ҳуқуқбузарлик содир этишига олиб келиши –

базавий ҳисоблаш миқдорининг 1 бараваридан 5 бараваригача миқдорда жарима солишга сабаб бўлади.