Темир йўл чипталарини сотиб олиш учун онлайн платформанинг 500 мингдан ортиқ фойдаланувчилари тизимни бузганликлари учун блок қилиб қўйилган. Улардан баъзилари маъмурий жавобгарликка ҳам тортилган. "Ўзтемирйўлйўловчи" вакиллари мухбиримизга шу тарзда компания фирибгарлар ва чайқовчиларга қарши курашаётганини айтишган.
Айни пайтда ушбу муаммо йўловчиларга хизмат кўрсатишга ихтисослашган "Ўзбекистон темир йўллари" шўба корхонаси " Ўзтемирйўлйўловчи"нинг асосий кун тартибларидан бири ҳисобланади.
Чайқовчиларга қарши кураш доирасида жорий йилнинг январ ойидан бошлаб Ўзбекистонда "бир қўлга битта чипта"лойиҳаси амалга оширилмоқда. Шундай қилиб, шахс паспортига ёки ID картасига фақат битта чипта сотиб олиши мумкин. Илгари, битта идентификация ҳужжати тақдим этилганда бир вақтнинг ўзида бир нечта чипталарни сотиб олиш мумкин эди.
Компания эксперти Суҳроб Давлетовнинг сўзларига кўра, ҳозирда чипталар умумий сонининг 65 фоизи онлайн платформа орқали сотилмоқда. Илгари бу кўрсаткич 40% эди.
"Уларни (электрон чипталарни) қайта сотиш ёки фирибгарлик ҳолатлари мавжуд эди, аммо бу фактлар саёҳат пайтида тезда аниқланади. Йўловчиларни поездга ўтказиш учун масъул бўлган ҳар бир ходим ўз мобил қурилмасида фойдаланувчи томонидан сотиб олинган чиптани сканерлаш ва номувофиқлик бўлса, бузилиш ҳолатини тезда аниқлаш имконини берувчи махсус иловага эга",- деди у кечаги йўловчи ташиш масалаларига бағишланган матбуот анжуманидан сўнг.
Айни пайтда, қоидабузарлар платформада блокировка қилиш шаклида жазоланади. Улар янги аккаунт яратишлари мумкин, аммо тизимга паспорт ва тўлов воситаларини қўшиш имкониятига эга эмаслар.
Шу билан бирга, Давлетовнинг айтишича, фирибгарлардан чипта сотиб олиш имконияти ҳали ҳам мавжуд, аммо буни анъанавий тарзда – бекат кассасида қилиш керак бўлади, чунки жисмоний чипталарни сотиш учун "қора" рўйхат ҳозирча йўқ.
Шунингдек, аноним қолишни истаган компания вакилларидан бири поездга ўтаётган одамларни тўлиқсиз текшириш ҳолатлари ҳақида фикр билдирди.
"Бизга барча темир йўл ходимлари чипталарни текширишни амалга оширмаётгани ҳақида хабарлар келади. Афсуски, бу мажбурий чора. Ҳозирда биз янги текшириш тизимини яратиш устида ишлаяпмиз, чунки жорий тизим жуда кўп вақт талаб этади ва Самарқанд каби айниқса гавжум зоналарда ҳар бир фуқаронинг тўлиқ текширилишини таъминлай олмаймиз – навбатлар чўзилиб кетади", - деди у.
Эслатиб ўтамизки, темир йўл саноатини рақамлаштириш давом этмоқда. Масалан, Тошкент Марказий бекатижа синов режимида шаҳарлараро чипталарни сотиб олиш учун терминаллар ўрнатилган. Яқин келажакда бундай қурилмалар республиканинг ҳар бир бекатида ишлай бошлайди.
